AU DIT DE BOURBON

Mon gracieux cousin, duc de Bourbon.

Je vous requier, quant vous aurez loisir,

Que me failles par balade ou chançon

De vostre estât aucunement sentir :

Car, quant à moy, saichez que, sans mentir,

Je sens mon cueur renouveller de joye,

En espérant le bon temps advenir

Par bonne paix que brief Dieu nous envoyé.

Tout crestien qui est loyal et bon

Du bien de paix se doit fort resioïr,

Veu les grans maulx et la destruction

Que guerre fait par tous pays courir.

Dieu a voulu crestienté punir,

Qui a laissié de bien vivre la voye;

Mais puis après il l'a veult secourir

Par bonne paix que brief Dieu nous envoyé.

Et pour cela, mon très chier compagnon,

Vueilliez de vous Desplaisance bannir,

En oubliant vostre longue prison

Qui vous a fait mainte doleur souffrir,

Merciez Dieu, pensez de le servir :

Il vous garde de tous biens grant mont-joye.

Et vous fera avoir vostre désir

Par bonne paix que brief Dieu nous envoyé.

Resveilliez-vous en joyeux souvenir :

Car j'ay espoir qu'encore je vous voye

Et moy aussi en confort et plaisir :

Par bonne paix que brief Dieu nous envove.