CHANSON LIX

Espoir, confort des maleureux, Tu m'estourdis trop les oreilles De tes promesses nompareilles, Dont trompes les cueurs doloreux.

En amusant les amoureux Et faisant baster aux corneilles, Espoir, confort des maleureux, Tu m'estourdis trop les oreilles.

Ne soiez plus si rigoreux, Mieulx vault qu'à raison le conseilles : Car chascun se donne merveilles Que n'as pitié des langoreux, Espoir, confort des maleureux !