BALLADE XXXVI

J'ay, où trésor de ma pensée, Ung mirouer qu'a y acheté; Amour, en l'année passée, Le me vendy de sa bonté ; Ou quel voy tousjours la beauté De celle que l'en doit nommer, Par droit, la plus belle de France.

Grant bien me fait à m'y mirer, En attendant Bonne-espérance.

Je n'ay chose qui tant m'agrée, Ne dont tiengne si grant chierté; Car, en ma dure destinée, Maintesfoiz m'a reconforté, Ne mon cueur n'a jamais santé Fors quant il y peut regarder.

Des yeulz de Joyeuse-plaisance Il s'y esbat pour temps passer, En attendant Bonne-espérance,

Advis m'est chascunne journée Que m'y mire, qu'en vérité Toute doleur si m'est ostée.

Pour ce, de bonne voulenté, Par le conseil de Léauté, Mettre le vueil et enfermer Où coffre de ma souvenance, Pour plus seurement le garder En attendant Bonne-espérance.