BALLADE LV

Pour Dieu! gardez bien souvenir Enclos dedans vostre pensée ; INe le laissiez dehors yssir, Belle très loyaument aînée!

Faictes que cbascune journée Vous ramentoive bien souvent La manière quoy et comment Ja pieca me feistes promesse, Quant vous retins premièrement, Madame, ma seule maistresse!

Vous sçavez que par Franc-desir Et Loyal-amour conseillée, Me déistes que sans despartir De m'amer esties fermée, Tant comme j'auroye durée.

Je metz en vostre jugement Se ma bouche dit vray ou ment :

Si tiens que parler de princesse Vient du cueur sans décévement, Madame, ma seule maistresse!

Non pourtant, me fault vous ouvrir

La doubte qu'en moy est entrée :

C'est que j'ay paour, sans vous mentir, Que ne m'aiez, très belle née, Mis en oubly : car mainte année Suis loingtain de vous longuement, Et n'oy de vous aucunement Nouvelle, pour avoir lyesse :

Pourquoy vis doloreusement, Madame, ma seule maistresse.

Nul remède ne scay quérir Dont ma doleur soit alégiée, Fors que souvent vous requérir Que la foy que m'avez donnée Soit par vous loyaument gardée :

Car vous congnoissiez clérement, Que par vostre commandement Ay despendu de ma jeunesse Pour vous attendre seulement, Madame, ma seule maistresse.

Plus ne vous convient esclarsir La chose que vous ay comptée :

Vous la congnoissiez sans faillir.

Pour ce, soyez bien advisée Que je ne vous treuve muée :

Car, s'en vous treuve changement, Je requerray tout haultement Devant l'amoureuse Déesse Que j'aye de vous vengement, Madame, ma seule maistresse.

Se je puis véoir seurement Que m'amez tousjours loyaument, Content suis de passer destresse En vous servant joyeusement, Madame, ma seule maistresse î