LE BON TEMPS

Chacun vivoit joyeusement Selon son estât et mesnage ; L'on pouvoit par-tout seurement Labourer en son héritage , Si hardiment que nul outrage N'eust esté fait en place ou voye, Sur peine d'encourir dommage :

Hélas ! le bon temps que j'avoye !

Lors estoye en la sauve-garde

De paix et de tranquillité ;

De mal ou danger n'avois garde ;

Justice avoit autorité ;

Le pauvre estoit autant porté

Que le riche plain de monnoye ;

Blez et vins croissoient à planté :

Hélas ! le bon temps que j'avoye !

Il n'estoit en ceste saison De logier par fourrier nouvelles , N'ez hostels mettre garnison ; Mais de faire chère à merveilles , Boire à deux mains , à grans bouteilles , Le gras fromage par la voye Qu'on mangeoit à grosses rouelles :

Hélas ! le bon temps que j'avoye !

Hé ! cuidez-vous qu'il faisoit bon En ces beaux prés , à table ronde ,

Et avoir le beau gras jambon , L'escuelle de poreaux profonde , Diviser de Margot la blonde Et puis danser sous la saussoye ?

Il n'estoit d'autre joye au monde :

Hélas ! le bon temps que j'avoye !

Du temps du feu roy trespassé ,

Ne doutois brigans d'un festu ;

Je fusse passé , râpasse ,

Mal habillé , ou bien vestu ,

Qu'on ne m'eust pas dit, d'où viens-tu?

Ni demandé que je portoye ;

Chemin estoit de gens bastu :

Hélas! le bon tenips que j'avoye!