février 1564. — Lettre de Charles IX à M. du Lude

Monsieur du Ludde, je viens d'estre adverty que sous prétexte d'un certain remuement qu'on prétend se devoir faire par la fin du concile, toute la noblesse de Poictou se

mect en arme^ faict provision de chevaulx, et semble qu'ils ayent envie de s'esmoiivoir, de quoy je ne puys estre qu'en peine et désirer d'en sçavoir la vérité ; et pour ceste cause, je vous prie ne faillir d'envoyer incontinent partout pour sçavoir ce qui en est, quelle est leur délibération et ce qui les meut, affin que, s'ils ont quelque crainte du concile, qu'ils croyent et s'asseurent que mon intention est que mon édict soit inviolablement observé, sans que je souffre qu'en chose quelconques il y soit faict aulcune violence ou innovation, et d'une part et d'autre, tous se contiennent doulcement sans riens entreprendre qui puisse troubler le repos public. Au demeurant, vous sçavez l'ordonnance qui a été faicte aux gouverneurs de ne laisser sortir de leur gouvernement hommes avecques armes sans sçavoir où ils vont et que c'est qu'ils deviennent, et que vous fault pratiquer en cecy si vous voyés qu'ils voulsissent partir de vostre gouvernement avecques leurs armes, vous priant ne faillir de m'advertir incontinent de ce que vous en aurés trouvé, et je prieray Dieu, Monsieur du Ludde, vous avoir en sa sainte et digne garde.

De Fontaynebleau, le xxviij® jour de février 1 564. Signé : Charles. Et plus bas : Robertet, avec paraphe.

Au dos est écrit : A Monsieur du Ludde, etc..