août 1568. — Lettre de Charles IX à M. du Lude

Monsieur le conte, par vos lettres du 28^ du passé S j*ay veu les nouvelles que vous avés aprinses de vos voisins, et mesme les maulvais desportemens desquels au lieu de se contenir comme ils debvoient, ils continuent d'user sans occasion, s'estans saisys du chasteau de Taillebourg et faict en icelluy les actes barbares et étranges que vous m'escrivés, chose que je ne puys trouver que très-maulvaise et pernicieuse, vous priant, Monsieur le conte, faire tout ce que vous pourrez pour leur coupper chemyn, en sorte qu'ils ne puissent passer oultre ne riens entreprandre au préjudice de mon service, à tout le moins si vous ne les pouvés faire rentrer en leurs limites, à quoy je vous prie employer tous moyens et à cest effect mander toutes les compaignies de mes ordonnances qui sont par dellà et mettre ensemble aultant de gens de guerre à pied avecques ceulx que vous avés desjà delà que vous pourrés, et cella faict, aller trouver ou attendre par dellà, ainsi que vous adviserez pour le mieulx, mon cousin le mareschal de Vielleville *, pour l'assister en la charge pour laquelle il y va, vous advisant que quant à ce que vous désirés que vostre compaignie vous soit entièrement entretenue, estant cella d'importance pour les aultres cappitaines, gens d'armes, desquels leur compaignye a été réduicte, comme vous sçavez, je désire que la réduction de la vostre soit faicte, ainsy qu'il vous a esté mandé, qui est tout ce que je vous puys dire pour le présent, priant Dieu, Monsieur le conte, qu'il vous ayt en sa garde.