ANTOINE DE BOURBON A LA REINE MÈRE DU ROI
9 octobre 1560.
Madame, recevant voz lettres de celle de la bonne vollunté de laquelle je me suis beaucoup promis, mesmement celles qu'il vous a pieu m'escrire par Boucher, mon secrétaire, présent porteur, qui m'a trouvé arresté en ce lieu dedans le lict. Il n'y a raison que je n'aye mise devant mes yeulx pour essaier à me satisfaire et consoller; mais comme chascun n'est pas maistre de ses passions, principallement de celles qui ont prins pied dessus trop raisonnable fondement, je suis contrainct de vous confesser, Madame, qu'encores que voz lettres m'alègent beaucoup, je ne laisse pas toutesfois de languir, et voy bien que je porteray tousjours ceste malladie, comme une fiebvre lente dedans le corps, jusques à ce que j'aye ce bien de veoir le Roy et vous, Madame, et que je me sois deschargé de tout ce qui me paise sur le cueur, me sentant en toutes sortes si indignement traicté pour les choses qui se passent, non seullement en tout ce royaulme, mais en ce mien gouvernement, affin de
me ruiner de réputation et honneur, et que tant plus je vois en avant, j'entens tousjours de nouveaux artifices en publications, ordonnances, deffences, rumeurs et aultres infiniz moyens par lesquelz si l'on ne me nomme appertement, on me montre toutesfois tellement au doigt et à l'œil que l'on n'essaye, ce croy-je, que de rompre ma patience. De laquelle m'estant jusques à présent si bien commandé qu'elle ne m'a peu faire penser ny voulloir que ce qui est de mon debvoir, je me contiendray, Madame, combien que difficillement, le plus doulcement qui me sera possible en ce bon office, prenant peine de me conduire, ainsi affligé que je suis, avecques Monsr le prince, mon frère, aux plus grandes journées que ma santé pourra porter; laquelle je ne pense jamais recouvrer que je ne vous aye veue. Et cependant se présentant l'occasion de mon cousin, Monsr le cardinal d'Armaignac1, lequel à son partement de Romme a eu charge expresse de nostre Sainct Père de me visiter, comme il a faict, et luy ayant declairé comme à l'ung de mes bons parens et amys beaucoup de mes plainctes et doléances, je l'ay prié Madame, s'en allant devers le Roy et vous, ainsi qu'il sera dedans ung jour ou deulx pour vous baiser les mains et satisfaire à l'obligation de son obéissance et servitude ; vous proposer et faire entendre une partye de mes ennuis, ne luy en ayant sceu tant dire qu'il ne m'en reste encores un tel faiz dessus l'esthomac que c'est à vous seulle à qui fault que je m'en descharge. Vous advisant, Madame, pour fin de ceste lettre, que tant pour obéir à vostre vol-
1. Georges d'Armagnac, né en 1501, mort en 1585. Il fut créé cardinal en 1544, et fut envoyé successivement en qualité d'ambassadeur de France à Venise et à Rome.
lunté que pour me jecter hors de ces peines et rendre le Roy aussi content de moy comme je sens bien en ma conscience qu'il a tout juste cause de l'estre, je ne fauldray point, si Dieu plaist, de vous donner occasion de luy tenir la promesse pour estre avecques Monsr le prince, mon frère, par delà au temps que vous me mandez; et connoistrez que les gens de bien ne craindront jamais d'approcher la présence d'un si bon roy que nous estimons le nostre. Envers lequel, Madame , je m'asseure qu'avecques vostre bonne grâce, à laquelle je vous supplye et désire d'estre tousjours très humblement recommandé, je seray reconneu tel que je m'en sens digne et mérite. Et en ceste confiance, je prie Dieu, Madame, vous donner en parfaicte santé très longue et très heureuse vie. Escript à Mussidan1 le ixe jour d'octobre 1560.
Vostre très humble et très obéissant frère et subject.
Antoine.
(Bibl. nat. Vc Colb. 27, fol. 36. — Original, signature autographe.)
ANTOINE DE BOURBON AU CARDINAL DE LORRAINE ET AU DUC DE GUISE
10 octobre 1560.
Messieurs mes frère et compaignon, je ne doubte-
ray poinct quant encores vous ne le m'eussiez escript
par les lettres que m'a baillez de voz partz le pro-
thonotaire Sabateri, qu'estans telz envers moy comme
1. Mussidan ou Mucidan, petite ville de la Dordogne, aujourd'hui chef-lieu de canton, à 28 kil. de Ribérac.
le sang, la nature et tous mes bons offices vous peulvent avoir renduz, vous ne soyez tousjours bien aises et louez infiniment Dieu, de veoir mes délibérations et intentions prendre aussi heureuse et honnorable fin que nous debvons tous désirer pour le service du Roy, auquel ayant cest honneur de toucher de si près que je fais, je ne confesseray jamais qu'il ait parent ny subject qui me surmonte de ceste affection ; et si luy plaist de l'avoir tellement aggréable et me juge digne de sa bonne vollunté, vous pouvez penser que la désirant, comme je fais, plus que tous les biens de ce monde, il ne me sçauroit estre malaisé à me sentir beaucoup obligé et aymer de mesme ceulx qui s'employront à la me conserver. Du nombre desquelz me promectant vostre lettre que vous estes, il n'y a plus que les effectz qui le me doibvent confirmer. Et cependant vous pouvez asseurer qu'estant en si bons et honnestes termes que nous sommes, n'ayant oncques escoutté personne qui soulz coulleur de noz particullaritez voullust troubler les affaires du Roy, je ne commanceray pas maintenant à y prester l'oreille, et que me respondant d'affection, ainsy que je crois que vous ferez, je la conserveray de ma part aultant inviolablement , comme pour tesmoignage de cela je me recommande affectueusement à voz bonnes grâces.
Pryant Dieu , Messieurs mes frère et compaignon, vous donner en santé bonne et longue vie.
Escript à Ribérac, le xe jour d'octobre 1560.
Vostre plus affectionné frère et milleur compaignon.
Antoine.
(Bibl. nat. Vc Colb. 27, f° 47. — Original, signature autographe.)
