ANTOINE DE BOURBON A M. LE CONNESTABLE

Le 11 mai 1556.

Monsieur mon cousin, j'envoye La Mothe présent porteur, l'ung de mes secrétaires, devers le Roy pour les occasions que je luy ay donné charge vous communicquer et faire entendre, dont je vous prie le croire comme moy mesmes, estimant que m'ayant esté par vous faict si souvent tant de déclaration de la bonne volunté que vous m'avez tousjours offerte, de me faire plaisir, vous m'ayderez à avoir la raison de ce président Lagebaston, lequel sans avoir autre respect aux lettres que le Roy luy a escriptes, luy mandant me renvoyer Chassarii de Garitz, mon aulmosnier, le me tient encores prisonnier : ayant publicquement dict qui sçait bien que vallent telles lettres, et comme il les fault prandre, et que le lieu qu'il tient, en l'asseurance qu'il a de l'intencion du Roy en ceste affaire, ne luy fera riens changer de sa proceddure, et que quiconques se sera essayé de la faire trouver mauvaise, il se tient tout asseuré, quant il voudra, de renverser toutes les oppinions que l'on pourroit avoir conceues contre luy ; qui sont parolles jettées pour adresser couvertement à moy seul, plaines de telles arrogance et téméraire malice que m'estant amy, comme je m'asseure que vous estes, vous ne me conseilleriez jamais de les passer soubz dissimulation. Aussy me seroit-il malaizé à la longue de ne rompre ma patience, et vous prie, Monsieur mon cousin,

ayant bien particulièrement entendu dudit La Mothe la vérité comme les choses sont, réprimant ung peu l'audace de ce monsieur, luy faire commander bien expressément de me renvoyer mon dit aulmosnier, de la personne duquel je respondray tousjours , et le faire ressentir du respect qui m'est deu et du lieu qu'il plaist au Roy que je tienne en sa bonne grâce. Me recommandant de tout mon cœur à la votre, et priant Dieu, monsieur mon cousin, vous donner ce que plus désirez.

Escript à Nérac, le xje jour de May 1556.

Votre bien bon cousin et parfaict amy.

Antoine.

(Bibl. nat. Fr. 3138, fol. 6. — Original, signature autographe.)

ANTOINE DE BOURBON A M. LE DUC DE NEVERS

26 mai 1556.

Mon frère, je sçay bien que vous ayant escript, comme j'ay faict pour surceoir la poursuicte et l'expédiction des affaires et différends que nous pouvons avoir l'ung avecques l'autre, espérant qu'à nostre première veue nous en accorderions amyablement ensemble, et voyant que ce temps auquel je vous avois promis estre par delà se retreuve encores si court et pressé que n'y puis m'y trouver si tost que je pensoys, vous serez en peine de l'occasion de mon séjour et comme vous y devrez conduire : qui est cause, mon frère, désirant me comporter tousjours

avecques vous d'une telle ouverture de cœur que vous ne doubtiez non plus de mon affection que je fais de la vostre, que je vous veulx bien ad viser qu'il ne m'est possible, plustost que vers la fin du mois qui vient, entreprandre mon voiage d'aller trouver le Roy, ayant faict une diette qui m'a rendu ung peu feuble, et pour ceste raison remises beaucoup d'affaires que je pensois dépescher plustost audit mois, qui sont l'assemblée des Estatz de mon royaume deçà [les] Portz * et de mon pays de Béarn , où pour estre nouvellement venu à ceste succession, il me fault nécessairement entendre ; et, quant bien je ne m'y pourrois trouver, favoriser pour le moings, m'en tenant le plus près que je pourray et ne m'eslongnant de ce pais, les affaires que j'y fays proposer. Ce que je vous prie voulloir considérer et attendre encore jusques à la my-juillet, dedans lequel temps je fais bien mon compte d'avoir ce bien de vous veoir moiennant l'ayde de Dieu, que je prie, mon frère, après m'estre recommandé de bien bon cœur à vostre bonne grâce, vous donner contante et longue vie.

Escript à Nérac ce xxvje jour de may 1 556.

Votre bien bon frère et parfaict amy.

Antoine.

(Bibl. nat. Fr. 3136, fol. 36. — Original, signature autographe.)

1. C'est-à-dire la partie en deçà des Pyrénées, dont les passages dans la Navarre espagnole portent le nom de Ports.

7 juillet 1556.

Ma mie, ceste lettre ne sera sinon pour vous avertir comme toute ceste compaignie se porte bien, ayant mieulx vescu de se que j'ay veu que les aultres fois, et sy je ne suis trompé, sy offence y a, ce n'a esté que des yeulx pour ce voiage. Dieu le veulle continuer en ceste bonne oppinion, et ne le voulloir non plus desplaire que ses commandemens nous le conseille et permeste. Je layray ce propoz saige pour vous en dire d'aultre de moindre importance. Nous nous en retournons demain vous retrouver, sain et sauve la breby, et avecques intension ung chasquung de faire son devoir an son endroit, au lit de honneur ou de noz fammes comme bon ménagers, sauvant de Paris son argent sans le despendre. Voillà le compte véritable de Paris : vous l'alourés1 sy vous plest en vos ecronnez2. Au demourant, je vous envoyé ung mellon qui me semble meur, je vouldrois qu'il fust bien bon ; sy ne l'est j'en suis bien marry, car je vousdrois que tout se qui viendra de moy eust mesme condission que ma voulonté, affin de vous (paraître) plus digne et agréable.

Qui sera la fin, ma mie, après vous avoir présenté mes affectionées recoman dations , de vous asseurer