DÉBARQUEMENT DES CROISÉS (5 JUIN

Turs, qui la estoient a cheval, se ferirent en la mer bien avantencontre nos gens, et assez de ceulz a pié. Quant nos gens qui estoient bien armé es vaissiaus, meismement li chevalier, virent ce, n’entendirent pas a suir le gonfanon monseigneur saint Denis, ainz alerent en la mer a pié tout armé, li uns jusques as aisseles, li autres jusques as mameles, li uns plus en parfont et li autre mains, selonc ce que la mers estoit plus parfonde en un lieu que en un autre. Assez y ot de nos gens qui traisent leur chevaus par grant peril, par grans travaus et par granz prouesces hors des vaissiaus ou il estoient. Adonques s’esforcierent nostre arbalestrier et traisent si durement et si espessement que c'estoit merveilles a veoir. Lors vinrent nos gens a terre et la gaaignierent.

X. Quant li Turc virent ce, sise ralierent ensamble et parlerent en leur langage, et vindrent sus nos gens si durement et si fierement que il sambloit que il les deussent touz occirreetdecouper. Mais nos gens ne se murent de sus le rivage, ainz se combatirent si viguereusement que il sambloit que il n’eussent onques souffert ne prisons ne travaus ne angoisses de la mer, par la vertu de Jhesucrist et de la sainte vraie crois que li legas tenoit en haut desus son chief encontre les mescreans.

XI. Quant li roys vit les autres sailliret descendre en la mer, il voult descendre avec euls. Mais on ne li vouloit laissier et toutevoies descendi il outre leur gré, et entra en la mer jusqu'a la chainture, et nous touz avec lui. Et, puis que li roys fu descendus en la mer, dura la bataille grant piece. Quant