DU PRÉVÔT ET DES ÉCHEVINS DE LA VILLE DE PARIS

(26 août 4568.)

Messieurs, M. Pierre Phelippeaulx , présent porteur, commis en vostre ville de Tours à recevoir les deniers que le Roy a allienez au corps de ceste ville sur les greniers de la generallité dudit Tours, nous a fait entendre le plaisir qu'il a receu de vous durant tous ces troubles passés, tant pour la conservation de ses deniers que de sa personne et famille, de quoy nous n'avons pas voullii faillir à vous remercier par la

présente et de rechef vous recommander ledit Phelippeaulx. Et, si en autre endroict nous pouvons quelque chose pour vous ou aucun des habitants de vostre dite ville, vous nous y trouverez bien prestz de vous faire plaisir et d'aussi bon cueur que nous nous recommandons à vos bonnes grâces, priant notre Seigneur qu'il vous doint, Messieurs, en santé longue et heureuse vie. De Paris, ce xxvf jour d'aoust 1568.

Voz frères et meilleurs amys les prevost des marchands et eschevins de la ville de Paris.