LETTRE LXII

du même. (25 juillet 1593.)

De par le Roy.

Nos amez et féaulx , suyvant la promesse que nous feismes à nostre advenement à cette couronne par la mort du feu Roy, nostre très honoré seigneur et frère, dernier déceddé, que Dieu absolve, et la convocation par nous faicte des prélatz de nostre royaume, pour entendre à nostre instruction, par nous tant désirée, et tant de fois interrompue par les artifices de nos ennemys, enfin nous avons, Dieumercy. conféré avecq

les ditz prelatz et docteurs, assemblez en nostre ville pour cest effect, des poinctz sur lesquelz nous desirions estre esclairci. Et, après la grâce qu'il a pieu à Dieu nous faire par l'inspiration de son sainct Esprit, que nous avons recherchée par tous noz vœuz et de tout nostre cœur, pour nostre salut, et, satisfaict par les preuves que iceulx prélatz et docteurs nous ont rendues, par les escriptz des Apôtres, des saints Pères et Docteurs receuz en l'Église; recongnoissant l'Église catholique, apostolique et romaine, estre la vraie Église de Dieu, plaine de vérité, et laquelle ne peut errer, nous l'avons embrassée et nous sommes résolu d'y vivre et mourir. Et, pour donner commancement à ce bon œuvre et faire congnoistre que nos intentions n'ont eu jamais aultre but que d' estre instruict , sans aulcune oppiniastreté , et d'estre esclairci de la vérité et de

la vraye relligion pour la suivre, nous avons esté ce jourd'huy à la messe et joint et uny nos prières avecq la dicte Église, après les cérémonyes nécessaires et accoustumées en telles choses, résolu d'y continuer le reste des jours qu'il plaira à Dieu nous donner en ce monde, dont nous avons bien voulu vous advertir pour vous resjouyr d'une sy agréable nouvelle, et confondre par noz actions les bruictz que nos dictz ennemys ont faict courir jusques à cette heure que la promesse que nous en avions cy devant faicte estoit seullement pour abuser nos bons subjectz et les entretenir d'une vayne espérance, sans aucune volonté de la mettre à exécution ; vous priant d'en faire rendre grâces à Dieu par processions et prières publicques, affin qu'il plaise à sa divine bonté nous confirmer et maintenir le reste de nos jours en une si bonne et saincte résolu-

tion. Et nous le prierons qu'il vous ayt, nos amez et féaulx, en sa saincte et digne garde.

Escript à Sainct- Denis en France, ce dimanche xxv" juillet 1593.

HENRY

Ruzé.

( Suscription. ) Noz amez et féaulx les maire et eschevins de nostre ville de Tours.