MAI. - A MESSIEURS DE GENEVE

res chers et bons amvs, Nous avons entendu

l'instance qui vous est faicte mesmes de la part de nos allyés confedérez des quatre villes pour vous faire entrer en certain traicté auquel semble que les Srs de Berne sont induicts et persuadez soubz couleur de l'asseurance d'ung repos qui neantmoings trayne après soy une suite toute contraire, mesmes pour vous en ce qui est de la seureté de vostre Estât avec la perte certaine de la recompense qui vous a esté designée des frais par vous faictz en ceste guerre, comme les causes et raisons en sont très apparentes, ce qui nous a meu de faire ainsi que nous faisons présentement, non seulement ausdicts Srs de Berne, mais aussi aux autres, les priant se désister de cette poursuite et eulx particulièrement demeurer fermes et constans en la protection de laquelle ilz vous sont obligez avec nous, suivant le traicté sur ce faict ; comme de nostre part nous sommes résolus de n'espargner ce qui dépend de nos moiens pour vostre deffence et service ; ne voulans cependant omettre de vous dire le plaisir et contentement que nous avons receu et vous remercier de la considération que en cela vous avez tousjours montré avoir à ce qui peut

toucher nostre service, ainsi que nous en avons esté advertis, qui nous rend de plus en plus désireux d'ayder à la conservation de vostre liberté et repos, et attendant la commodité de faire mieulx nous avons à présent faict pourveoir de quelque moyen pour ayder à l'entretenement du Sr de Souforzan avec quelques personnes près de lui et mandons qu'il ait à continuer le service auquel qui est employé en vostre ville, que nous tenons faict à nous mesmes; et combien que nous sommes asseurez de vostre ferme résolution de ne condescendre à aucune chose contraire au devoir de nostre amitié, si est ce que n'avons voulu laisser de vous prier par ladicte présente vouloir persévérer en la bonne volonté qu'avez jusques à présent tesmoigné au bien de nos affaires, vous asseurant que nostre assistance ne vous deffauldra en tout besoing que vous en pourrez avoir pour vous garantir d'oppression et violence ainsi que nous avons donné charge au Sr de La Violette de vous dire encores particulièrement de ma part; et sur ce nous prions Dieu

(Collection Godefroy, t. 514.)