NOVEMBRE

Lettre du Roy à la Cour sur la bénédiction qu'il a receue du Pape, pour en rendre grâces à Dieu. (Extraict des registres de Parlement de samedy nc décembre 1595.)

e jour ont esté présentées et veues par la Cour les lettres closes du Roi, desquelles la teneur ensuict : De par le Roy. Noz amez et feaulx , Depuis qu'il a pieu a Dieu nous inspirer heureusement à la Relligion Catholique, Appostolique et Romaine , Nous n'avons poinct eu de plus grand désir que de veoir nostre conversion suivie de la bénédiction de nostre très amé sainct Pere le Pape, laquelle Nous avons recherchée d'autant plus hardiement que Nous avons veu qu'elle estoit nécessaire pour nostre salut, bien de nostre Estât et la tranquillité des consciences de noz subjetz qui n'estoient encores satisfaictz , et bien que nos ennemys n'aient espargné aucunes inventions ny artiffices pour traverser ce bon œuvre auprès de sa Béatitude, ilz y ont sy peu proffitté que leur injuste poursuitte ne leur a servy que pour manifester davantage leurs ambitieux desseings et faire parroistre à tout le monde que le manteau de pieté duquel ilz ont voullu couvrir leurs

armes n'a esté qu'un masque pour essaier d'envahir et usurper ce Royaume, car sa Saincteté, sans s'arrester à leurs dictes poursuittes, Nous a honnorez de sa dicte bénédiction pour l'entier repos de nostre âme et la seureté de cet Estât, lequel ayant jusques icy résisté à ses ennemis, combien en aura il plus de moiens mainstenant qu'il est reconcillié avecq le Sainct Siège Appostolicque et fortiffié de l'assistance de nostredict Sainct Pere, de laquelle Nous espérons recevoir autant de consollation et d'utillité que les Roys nos prédécesseurs en ont tiré par le passé. De quoy Nous n'eussions tardé sy longuement à vous donner advis, sy à nostre retour de Lion, Nous ne fussions accouruz à cette frontière pour y arrester le progrez de nosdictz ennemis, et d'autant que escrivons présentement aux evesques de nostre Royaulme qu'ilz aient à en faire remercier Dieu en leurs Eglises, et aux Gouverneurs de noz Provinces et villes particullières d'icelles, que le jour que lesditz Evesques ordonneront les dictes processions, ilz aient à faire tirer l'artillerie, allumer feux de joye et tesmoigner par touttes autres démonstrations combien Nous estimons la bonne grâce de Sa Saincteté, Nous vous en avons bien voullu aussy faire ceste lettre, affin que de vostre part vous contribuez à ceste action de grâce tout ce que vous y pourrez apporter pour la rendre plus cellebre, assistans en corps et en robbes rouges à ladicte procession, et tenant la main que chacun s'acquitte dignement de ce devoir et vous nous ferez service très agréable. Donné au camp de Tramery près la Fère le xxiiii6 jour de novembre 1595. Signé : Henry, et plus bas, De Neufville.

Icelles veues, la matière mise en délibération, ladicte Cour a arresté et ordonné que procession generalle sera faicte à laquelle elle assistera en robbes rouges et chapperons ; et à cette fin s'assemblera en la Grand' Chambre du plaidoié demain sept heures du matin; et ira la dicte procession de l'église de Paris à Ste Geneviève ; et sur ce qui a esté depuis raporté que le Sieur Cardinal de Gond y supplie la Cour remectre à ung aultre jour ladicte procession à cause que demain commance l'advant et le service est tel qu'il ne se peult faire ladicte procession , ladicte Cour a arresté que ladicte procession generalle sera faicte mercredy à l'heure susdicte.

(Fonds Dupuy, 379, f° 104, r°.)