AUX CARDINAUX DU SAINT-SIÈGE

Saint-Just-lez-Lyon, 2 juin 1496.

L'évêque de Sion a été chassé de son siège et spolié de ses biens par ses sujets en haine des bons services qu'il a rendus à la France. Prière d'intervenir auprès du pape pour qu'il lui plaise faire rétablir ledit évêque sur son siège et dans ses biens. — (Orig. Arch. de Milan.)

Charles, par la grâce de Dieu roy de France. Très chiers et grans amys, nous escripvons présentement à nostre Saint Perc le pape que, en faveur et par amour de nous, il plaise à Sa Sainteté n'atempter ou innover aucunement à l'encontre de nostre très chier et bon amy Josse, evesque de Syon, ne procéder à la privation de son beneffice, comme aucuns occultement sollicitent et pourchassent faire, soubz couleur de quelque vindicacion ou inimitié exquise et sollicitée en hayne des bons services à nous faiz par ledict evesque et les siens, quelle chose bonnement ne se pourroit fere, et aussi ne le pourrions permettre, car les affaires d'icelluy evesque reputons nostres, mais au contraire que icelle Sa Sainteté luy octroyé provision par

laquelle il puisse contraindre par censures ecclésiastiques et autrement les Vallesiens, ses subgectz en temporel et spirituel, qui n'a gueres l'ont, de leur auctorité privée, par voye de fait et main armée, assiégé en son palais et maison episcopal, icelluy prins prisonnier, ravy et emporté ses biens, et après l'ont chassé, spolyé et mis hors par force de sondict evesché, à le recevoir, remettre, réintégrer et restituer en sondict evesché, luy rendre et faire restituer les biens meubles et immeubles qui luy furent par eulx prins et ostez, et avec ce que d'eulx soit faicte griefve pugnition et correction à l'exemple de tous autres, le tout pour les causes et ainsi que plus au long verrez par le double de noz lettres que vous envoyons cy dedans encloz*. Et pour ce que l'église dudict Syon est de la fondacion et dottacion de noz progeniteurs roys et que sommes raisonnablement tenuz la soustenir, garder et defPendre de toutes forces et violences qui sont grandement à reprimer, et que sur toutes choses desirons ledict evesque de Syon estre doulcement et favorablement traicté en ses affaires, nous vous prions le plus affectueusement et de cueur que faire povons que, en faveur et pour amour de nous, vous vueillez sur ce employer et tenir la main, tant faire et intercéder envers nostredict Saint Père qu'il plaise à Sadicte Sainteté faire ce dont la requérons, qui nous sera faire chose moult agréable et de grande recommandacion envers nous et pour vous et les vostres en gênerai et particulier. Très chiers et grans amys, nous pryons le benoist filz de Dieu vous avoir