Antoine de Bessey, bailli de Dijon

dudict lieu de Rapello et que mondict frère eust de leurs nouvelles, fist à encommencer à faire descendre les gens desdicts navires et galées et fut alors commencée l'escarmouche par laquays et aucuns Suysses qui estoient marchez devant pour gaignier ung pont que les ennemys avoient fortifié et gardoient, et pour gaignier icellui pont fut l'escarmouche fort belle et renforcée de tous coustez, et gaignié ledict pont, et perdu d'un costé et d'autre, et beaucop de tuez. Et à la fin y demoura mondict frère victorieux. Et furent lesdicts ennemys repuisez dedens ledict village de Rapello en leur fort. Et, en ce faisant, en y eut beaucop de bleciez et de tuez entre ledict villaige et le pont et en une praerie où en ung coing d'icelle y avoit une grosse flote de dix huyt cens à deux mille hommes, dont messire Biote^ et le filz du cardinal de Fregonce^ estoient chiefz, et en laquelle praerie se leva l'escarmouche plus grande que elle n'avoit esté audict pont et renforcée de tous costez. Et alors ledict seigneur de Piennes et ledict seigneur de Dijon, qui avoient la grosse flote des Suysses, marchèrent pour passer le pont et gaignerent la praerie, et mondict frère, qui pareillement fist marcher les gens, lesquelz il avoit fait getter à terre, pour d'un costé et d'autre donner sur ladicte flote qui avoient semblablement grant quantité de gens parmy le bois et les montaignes. Lesquelz ennemys, quant ilz veirent marcher vers eulx, firent semblablement marcher à l'encontre et tindrent bonne contenance jusques à l'approuchier.