A GILBERT DE LA FAYETTE

Lyon, 21 mars 1490.

Le pape a accordé au roi l'expectative de la première prébende vacante en l'église de Clermont-en-Auvergne pour son aumônier Bertrand Grenier; ordre d'en informer le chapitre de aermont. — (Orig. Bibl. nat., f. fr. 2888, fol. 9.)

De par le roy.

Nostre amé et féal, nous avons fait avoir ung mandat de nostre Saint Père le Pape à nostre cher et bien amé chappelain et soubz aumosnier ordinaire, maistre Bertrand Grenier, sur l'église de Clermont en Auvergne, pour avoir et obtenir la première prébende qui en icelle vacquera, comme par plusieurs foiz avons escript au chapitre d'icelle église. Mais pour ce que, par inadvertence ou autrement, aucuns ont ou pevent avoir obtenu lettres de nous adreçans audict chapitre et vous et autres avoir eu charge d'en parler et que, au moien d'icelles lettres et choses dessusdictes, icellui chapitre pourroit bailler compediteur à nostre-

dict chappelain quant ladicte prébende vacqueroit, qui seroit, si ainsi estoit, totalement contre nostre voulenté et intencion, à ceste cause vous en avons bien volu advertir et vous prions et neantmoins mandons que, ces lettres veues, vous en alez devers ledict chapitre et leur dictez et remonstrez que, une foiz pour toutes, nostre vouloir et totalle affection est que nostredict soubz aumosnier, en ensuivant son mandat, soit pourveu de ladicte première prébende et à icelle préféré avant tout autre, nonobstant quelzconques lettres, créances et mandemens de bouche que pour vous ou autres pourions à vous et à iceulx dudict chapitre désormais escripre ou avoir escriptes et faites, et neantmoins, quant vaccation y escherra, vous y transportez et y besongnez en telle manière que la chose sorte son effect ainsi que le desirons. Et en ce faisant nous ferez service très agréable. Donné à Lyon, le XXI* jour de mars.

Charles.

Marcel.

Nostre amé et féal Gilbert, seigneur de la Fayecte'.