LES SÉNESCHAL , LIEUTENANT ET PROCUREUR DE RÉ
A MONSEIGNEUR
Monseigneur, dès long temps vous avons escript , et adverty mess" voz auditeurs de comptes, de l'urgente repparation qu'il convient faire à voz prinsons de ceste vostre ysle, les quelles sont toutes ruynées en manière que nous n'y povons garder les prinsonniers. Et en est advenu beaucoup d'inconvéniens de ce que plusieurs prisonniers s'en sont allez d'icelle sans souffrir pugnition: mesmement une femme nommée Trichereau, laquelle et ung sien adultère, avoyt tué son mary : et aussi ung nommé Robinet Marette et plusieurs aultres : la quelle chose nous redunde à déshonneur et à maulvays exstime du peuple à deffault de pugnir les délinquans, ce que ne pouvons faire sans la seurté et force des dictes prinsons; et si justice n'est administrée près de la rigueur en ceste ysle, il n'y a homme qui ne seroyt en dangier de sa personne, et nous plus que aultres.
Ladicte somme pourra, à la faire moindre que faire se
pourra, [monter] à la somme de cent cinquante livres et plus;
et est requis par neccessité que ordonnez la mise y estre faicte
jusques à ladicte somme. Nous vous supplyons qu'il vous plaise
y avoyr esgard, pour l'honneur de vostre seigneurie, du bien
de justice et du public. Et qu'il vous plaise nous faire tenir
par le recepveur le sac et pièces d'un nommé Jehan Bodin,
lequel vous a esté par nous envoyé, par vostre commandement,
parce que ledict Bodin poursuyvoyt avoir de vous sa rémission
des cas dont il est chargé; pour les dictes pièces receues luy
faire et parfaire son procès, car c'est ung maulvays garson,
et si ne luy estoict faict yssue par justice en demouryons
chargez vers vous, Monsgr; et [nous] a quelquesfoiz poursuyviz,
par les gens du Roy, noz suppérieurs en la ville de la Rochelle, ainsi que feustes par nous adverty à la dicte Rochelle. Monsgr, nous supplions le Créateur vous donner voz haultz et très nobles désirs.
De vostre ysle de Ré, ce quatorziesme de janvyer mil cinq cens quarente.
Voz très humbles serviteurs, subjectz et obéissans,
