A MONSEIGNEUR LE DUC DE TOUARS

Monseigneur, il vous avoit pieu me commander dernyèrement, quant partîtes de ce lieu, que je allasse vers Monsgr de Monpancier pour luy présanter vous humbles recommandations et excuzes pour lesquelles ne le pouvyés aller voirs, ce que j'ay faict; et m'a dict qu'il estoit bien marry que les moyens ne se présantoient de aizémant confédérer ansamblemant vous et luy pour le regard des afîères qui se présantent en ce pays, et que sy vous ne prenés gardes, mesmement de ce lieu de l'Isle- Bouchart, il craint que ne serves surprins et que n'an ayés annuy. Mons' de Monpancier a rescript, par moy, aux quatres députés la fortification de vous pons levis, tandant afin de les fera fere; toutefois ilz n'en ont faict aucune dilligence. Mons' le prince Daulfin (3) a pareillemant rescript aus maires et habitans de ceste ville, par le maréchal de sa compagnye, que en attandant la fortification de la motte du chasteau à fere, que haussent à luy obéir à marquer le logis de sa compagnye, qu'il dit devoir arriver demain en ceste ville; qu'il entent y lesser la moytier de sadicte compagnye, qui aportra une grande incommodité à vous subjectz s'il ne vous plest y donner ordre. Je ne sache autre chouze pour le présant qui mérite vous avertir ; et s'il survient quelque chouze de nouveau, je ne feré faulte de le vous fere antandre. Qui est l'androict où je vous vois présanter

mes très humbles recommandations et prie Dieu, Monsgr, vous maintenir en vostre grandeup et vous donner bonne prospérité et santé. *

A risle Bouchart, ce premyer jour d'aust. Vostre très humble et obéissant serviteur,