PREUVE XCI

[1527], 3 décembre, Brou. — Lettre de Louis de Gleyrens à Marguerite d'Autriche concernant les travaux de Brou.

jAutographe. Arch. Nord, B 19184, n° 44586].

Jhesus. Nostre tres redoubtée dame et mere tres benigne, Dieu vous doint bonne vie et longue. Vous plaise savoir que depuis le partement de maistre Loys, nous avons faict et faisons la meilleur diligence que pouvons. Et en suivant son ordonnance, avons faict fonder le jubé et les charniers pour reposer les corps des princeps et conlinuerons a faire chaver au bas du cueur pour les religieux ainsi que ledit maistre Loys a ordonné. Et avons aussi faict clorre la croysée afin que, puis qu’elle est voltée et blanche, n’y soit faicte macule. Et aussi l’on a dressé le charpentage de la penultime volte de la nauf et icelluy couvert entierement. Et sont les ouvriers tant massons, chapuis que verriers, apres les tailles tant des sepultures que autres ouvrages comme ledit maistre Loys a laissé en son ordonnance par escript, et aussi maistre Conrald [Meyt] faict bon devoir a mon advis, lequel m'a solicité fort et demandé tous les jours si j'ay point de nouvelles et s’il y a point d'ordre pour avoir le marbre, auquel je ne sçay que respondre jusques a ce que je aye response de cecy par Vostre Excellence, car comme vous rescrips dernierement, le marchant laissa

de prendre la charge pour non avoir respondant des fretz. Pourquoy vous supplie qu’il vous plaise mander a vostre tresorier de respondre audit marchant, et aussi vous requiers commander que l'on me transmecte par le present porteur la descharge de l'argent qu'il vous plaira ordonner pour l’année qui vient, car je n’ay plus d'argent que pour ceste sepmaine, par quoy suis contrainct d'envoyer le present porteur au secours par devers Vostre Excellence lequel, si ne l’ay en brief, suis en dangier de rester en la bataille, et les compaignons de demeurer sans argent et capitaine. Escript en vostre couvent de Brou, ce III° jour de decembre.

Frere Loys de GLEYRENS, religieux de Brou.