PREUVE XCIV

1529, 10 août, Cambrai. — Lettre de Marguerite d'Autriche au duc de Savoie sur la paix de Cambrai.

{Original signé. Turin, Arch. de Cour, Lettere principi Saroia, maz1o 2/.

Monseigneur mon bon frere. Apres pluseurs communications qu’avons 1cy tenues longue espace de temps avec madame ma bonne seur la duchesse d’Angoulmois, mere du Roy Tres Chrestien, sur la conclusion du traicté de paix a desmeler entre ces deux grands princes, finablement a l’ayde de Dieu y avons trouvé une si bonne resolucion que ladicte paix a esté conclute et par nous deux solennellement jurée le V° de ce mois en l’eglise cathedrale de ceste cité a l'honneur de Dieu, nostre createur, et au bien desdicts princes, leurs bons amys et allyéz et de toute la Chrestienté. Et pour ce que estes du nombre des dicts leurs bons amys et allyéz, vous en ay bien voulu avertir et comment vous ay comprins de par Sa Majesté en icelle paix, saichant que ne vous resjouyrés moings d'icelle que moy mesmes, qui si longuement y ay labouré, et ay ferme espoir que desormais l’effusion du sang chrestien cessera, et convertiront les princes leurs forces contre les Infideles, a l'honneur et exaulcement de nostre Saincte Foy, dont je prie a Dieu leur donner la grace, et a vous, Monseigneur mon bon frere, bonne vie et longue. De Cambray, ce X° d’aoust anno XXIX.

Vostre bonne seur, Signé : MARGUERITE.

(Au dos) : À monseigneur, mons. mon bon frere le duc de Savoye fCachet sur papier, parti de Savoie et d'Autriche/.