PREUVE LVII

[1511], 16 juin, Bourg. — Lettre du clergé de N.-D. de Bourg à Marguerite d'Autriche concernant la construction et les stalles de cette église.

{Orig. Arch. Nord. B 19180 n° 4%447 ; rf. pour l'attribution de date, le mandement du 15 juillet 1511, Arch. Nord, B 22292, fol. 35].

Madame, nous vous remercions tres humblement la bonne volanté et devocion singuliere qu'avés eue et avés continuelement en vostre esglise de Nostre Dame de vostre ville de Bourg, pourquoy sumes desliberer a james estre vous tres humbles et obeissans subgectz, serviteurs et orateurs, bons amis et favorables a vous religieux.

Au surplus, nostre tres redobtée dame, vous savés et entendés assês la pouvreté et necessité de vostre dicte eglise de Nostre Dame; nous diligentons le plus que povons il fere journelement quelque ediffice en tant que, a l’ayde de Dieu et de vous, nostre bonne dame, protecteresse et princesse inspirée du Sainct Espirit, avons mis propos recourre a vostre bonne grace que vostre plaisir soit, et pour l'honneur de Nostre Seigneur et de Sa Glorieuse Mere, voloir avoir pitié de vostredicte eglise, esperant que dedans peu de lemps, a vostre bonne ayde, que les eugives et pilles pour fere les deux votes serons achevées, pourquoy, nostre bonne dame, avons entreprins, se pendant que se ferons lesdictes eugives et pilles, fere faire les formes de vostredicte esglise, nous confiant en vostre bonne ayde, et avons faict prins avec les maistres, si vostre bon plaisir sera, pour le nombre de quarante quatre des deux costés, une cheschune forme pour le pris de trante florins, et les quatre crosses deux cent et quarante florins, comme si vous plaist verrés pour les portrais, en vous suppliant en toute humilité que en se principalement ayés vostredicte esglise pour recommandée. Escript a Bourg le XVI° jour de juing.

Vous tres humbles obeissans subgetz, serviteurs et orateurs, les prestres de vostre esglise de Bourg.

Au dos: À ma tres redoubtée dame.