Gredance

et le panetier la met sur son espaule senestre, les deux bouts pendans devant et derrière ; et puis le sommelier luy baille la salliere couverte, laquelle ledit panetier doibt porter entre ses dois tenant entre le piet et le ventre de la salliere, en différence du goubellet, qui se doibt porter par le piet; et va le panetier après l'huissier de la salle, la teste nue ; et après luy va le sommellier, qui porte en ses bras la nef d'argent qui sert à l'aumosne1 ; et dedans icelle nef2 sont les trenchoirs d'argent et la petite salliere, et une autre petite nef; ensamble le baston3 et lycorne dont on faict l'espreuve en la viande du prince. Et, eulx venus en la salle et devant la table, le sommellier doibt asseoir la nef où le panetier luy monstre, et doibt estre le bas bout ; et le panetier ouvre la salliere, et du couvercle prend4 du sel, et le baille audit sommellier, qui en faict l'assay en présence dudit panetier ; et lors assiet iceluy panetier sa salliere et ses trenchoirs, la petite salliere, la petite nef et l'espreuve, et puis met sa serviette pendant 5 à la nef. Et quant le prince veult laver, le panetier baille la serviete au premier maistre d'hostel qui doibt servir pour ceste fois. Le maistre d'hostel le doibt bailler au premier chambellan, et le premier chambellan le baille à sa discrétion au plus grant de luy, se plus grant y a, et rend au maistre d'ostel icelle serviete. Après que le prince a essué ses mains, le maistre d'hostel la rend