D'aguect, par embûche

pour ce que l'abruvoir estoit hors de la ville d'Arlon, et doubtoit de perdre son cheval, luy mesme l'alla abruver, et trouva en l'abruvoir deux cranequiniers, qui desjà tenoient manière d'abruver. Si cuida ledit archier que ce fust de nos Allemans, et les cranequiniers luy firent courtoisement place entre eulx deux, et tantost en revint deux aultres à la queue, et tous quatre monstrarent le vireton sur la corde à l'archier, lequel se trouva despourveu, et le creanterent et l'amenèrent à Lucembourg, et de là en avant fut ordonné que gens d'armes garderoient l'abruvoir à l'heure d'abruver les chevaulx ; et sçay bien que, quand nous paiges allions à l'eaue avec les chevaulx du duc, dix ou douze lances estoient ordonnées pour nous convoyer. De telles petites prinses et aprinses firent les Zassons sur nostre compaignie, et peu ou riens de grandes ne de chose qui à ramentevoir face. Si marcha le duc plus avant en pays, et toujours luy venoient et croissoient gens de toutes parts, et venoient à luy tous les seigneurs et nobles hommes de ladicte duchié, qui tenoient places et seignories en hommaige de ladicte duchié, comme le Sangler d'Ardanne, nommé le Damoiseau1, Jehan de la Marche2 et aultres grans personnaiges ; et le plus de résistance que trouva le duc au pays, avec les deux villes dessusdictes, fut le damoiseaul de Rodemac3, qui est un grant seigneur en icelle marche. Gelluy tenoit fort bon pour les Zassons, et estoit mauvais Bourguignon en couraige ; mais il

1. Evrard III do la Mark, seigneur d'Arenberg, baron de Lumain.

2. Jean de la Mark, seigneur d'Arenberg et de Sedan, fils d'Evrard.

3. Gérard, seigneur de Rodemacb (liodenmacher) , de Cronenbourg et de Neufchâtel.

garda sa maison et fit petite guerre, car il escoutoit qui en auroit du meilleur. Pareillement le damoiseau de Commercy avoit au pays aucunes places prinses par ses adherans, comme Jaquemin de Beaumont et aultres , et avoit ledit Jaquemin , à l'adveu dudit damoiseau, prins et pillé la ville de Mommedi, qui luy fut, par le prevost de Merville et aultres Lucembourgeois, recousse et la ville et la proye. Mais touteffois tenoit encoires ledit damoiseau la place de Chavancy, et en son nom ledit de Beaumont tenoit Villy, qui fut assiégée à l'entrée du duc au pays, comme dit est; et tenoit ledit de Commercy grosse garnison en ladicte place de Chavancy secrètement, attendant son heure, [tant] que à l'aide d'aultres et d'iceulx, s'il voyoit son advantaige, cuydoit lever le siège ou faire son prouffict à l'encontre des Bourguignons, ses ennemis, comme vous ourrez cy après.

Ainsi chevaucha le duc et son armée par le pays et duchié de Lucembourg, et toujours gaignans places et forteresses, qui se rendoient et faisoient obéissance au duc, au nom de leur duchesse, et venoient nobles hommes voisins, de toutes pars, eulx présenter au service du duc, et mesmement ceulx de Mez ouffroient leurs soudoyers semblablement au duc ; et à tous et à chascun faisoit le bon duc si bon visaige et si agréable rccuil, que chascun se contentoit de sa bonne grâce avoir et desservir; et n'arresta gueres à icellc fois le duc en la ville de Arlon, qu'il se tira par le bas pays, laissant Lucembourg à la main senestre ; et se tira en une petite ville que l'on nomme Florehenges , appertenant lors à Henry de la Tour, à cause de sa femme ; et là se logea le duc, et mena avec luy la duchesse de

Luxembourg, sa tante, qui desjà estoit si goûteuse qu'il la falloit porter de maison en maison et de lieu en aultre, en une selle. [Si] se logea le duc au chastel; et le conte d'Estempes1, et le bastard de Bourgoingne et son armée se logèrent à une bonne lieue de là sur costiere, en ung lieu nommé Catenant2, et aultres villaiges prouchains; et se tenoient sarrez et près de leurs harnois, car ilz n'estoient que à une petite lieue de Tionville3, une très bonne ville de guerre plaine de gens d'armes, et la plus hostinée contre le duc qui fust en tout le pays. Et pareillement estoit logé le duc aussi près ou plus, et veoit on de Tionville clerement à Florehenges, et tant que le duc fit en ce voisinaige moult de courses devant icelle ville, l'une fois par le conte d'Estampes, l' aultre par le bastard de Bourgoingne, et l'aultre par ceulx de la court, et qui estoyent avec le duc, comme le conte de Ne vers qui aucunefois y faisoit son tour, et autrefois Jehan, monseigneur de Gleves ; et le plus souvent couroient les gens d'armes, compaignons de la court, sous moindre chief, dont le bastard de Sainct Pol, seigneur de Halbourdin, avoit le plus souvent la conduicte et la charge, et lequel fut de son temps moult beau chevalier, saige, vaillant et redoubté en armes, homme de conduicte, et qui beaucop avoit veu de la guerre, homme expérimenté de François et d'Angloix, chevalier de l'ordre de la Thoison d'or, et l'ung des renommés de son temps.