Boulevart

pour lors estoit la renommée et le bruit de tout le pays en cas de beaulté, de sens et de vertuz, avec grant foison de dames et damoiselles, de chevalerie et de noblesse, veirent comme les targes estoient gardées par le herault dessusdit ; et cuydoit le bon chevallier de Lalain que aucungs d'iceulx estrangiers, François, Ytaliens, Provençaux ou aultres, dont il y avoit plusieurs grans, gorgeas1 et honnestes personnaiges à la court du duc d'Orléans, deussist avoir pitié de la dame de Plours là figurée, et toucher à aucunes de ses targes. Mais riens n'y fut entreprins, ny ne survint audit pas aultre chose pour icelluy mois, ne jusques au mois de septembre que l'an de l'emprinse s'expiroit, et lequel mois de septembre fut honnorablement et chevaleureusement exécuté, comme vous ourrez cy après. Et si ne firent le duc et la duchesse que passer par Bourgoingne, en s'en retournant en leur pays ; et là je veiz la première fois monseigneur François, filz et héritier du conte d'Estampes2, nepveur du duc d'Orléans, et frère de ladicte damoiselle d'Arguel, jeusne prince pauvre et disetteulx, mais vertueulx, bel et de grande apparence, et lequel, par succession du duc Artus, connestable de France, fut duc de Bretaigne, et moult vertueulx prince, comme j'ay intencion, à l'aide de Dieu, de declairer et mectre par escript.

Le temps et les mois se passèrent, comme dessus est dit, jusques au premier samedi de septembre, dernier mois d'icelluy pas; lequel samedi fut le deu-