Né le 10 novembre

et armez au parc de Brucelles, et furent le bon duc et la duchesse presens à celle espreuve. Lances leur furent baillées ; et à celle première course le conte ferit messire Jaques en l'escu et rompit sa lance en plusieurs pièces ; et messire Jaques courut hault, et sembla au duc qu'il avoit son filz espargné, dont il fut mal contant, et manda audit messire Jaques que s'il vouloit ainsi faire, qu'il ne s'en meslast plus. Lances leur furent rebaillées, et ledit messire Jaques de Lalain laissa courre sur le conte; et d'aultre costé vint le conte moult vivement, et se rencontrèrent tellement qu'ilz rompirent leurs lances tous deux en tronssons ; et ce cop ne fut pas la duchesse contante dudit messire Jaques ; mais le bon duc s'en rioit, et ainsi estoient le père et la mère en diverse oppinion. L'ung desiroit l'espreuve et l'aultre la seureté ; et à ces deux courses faillit l'essay du noble conte, et duquel essay furent les saiges moult contans et rejouys, pour ce qu'ilz virent leur prince advenir prendre les armes et soy monstrer couraigeux et homme pour ensuyre la noble lignée dont il estoit issu. Et se passa le temps jusques au jour des joustes, qui se feirent sur le marché de Brucelles; là1 eust grant assemblée et grant noblesse, et fut emmené le conte Charles sur les rangs, et accompaigné par le conte d'Estempes, son cousin, et par plusieurs aultres princes, chevaliers et nobles hommes; et le tenoit fort de près le seigneur d'Auxi2 et Jehan de Rosimboz, seigneur de Formelles3, ces