Grand faict sans moy nul ne peut achever

Les lasches cueurs qu'on ne peut esmouvoir A travailler, pour tous les biens avoir.

Espérance.

Je, Espérance, guide de bon vouloir,

D'ardant désir à vous je me présente.

La grant honneur, la richesse et l'avoir

De ce monde, conquesterez pour voir.

Nul n'osera devant vous faire attente.

Requérez Dieu, et mectez ferme entente

D'estre en brief temps prest pour le Turc combatre;

Et vous verrez son grant orgueil abatre.

Vaillance.

Prince, enflambé de désir pitoyable,

Et vous, nobles, où tout honneur s'avance,

Cueurs tous enflez de vouloir honnorable.

Aimans renom, querans œuvre louable,

A vous j'acours en grande esjouissance.

Fille d'honneur suis, et m'appelle on Vaillance.

Je vous requiers qu'on ne me laisse point;

Car, sans m'avoir, grant faict ne se faict point.

Après les presentacions de ces douze vertuz, faictes par Grâce Dieu à mondit seigneur, et nécessaires à la perfection de son emprinse, quant les noms et leurs briefz furent leuz, veuz et ouyz en plaine salle et en commune audience, atant elle, comme ayant sa charge parfournie et son œuvre parachevé, d'illecques se voulut retraire. Si print son congié par la manière qui s'ensuyt, conseillant et saluant mondit seigneur ainsi : Grâce Dieu.

Puis qu'ainsi est que je vous ay baillées

Ces filles cy pour vostre parement,

Je vous prie1 que soyent recueillies