Le 27 ou 28 avril

tira le duc en sa ville d'Arras, ouquel lieu furent les lices préparées sur le grant marchié, au droit de l'hostelerie de la Clef. Et fut une grande maison eslevée, qui venoit jusques sur le bord de la lice, bien avant audit marchié. Ladicte lice fut carrée, de moult grande et spacieuse grandeur, et estoit toute double et de gros marrien ; et l'entrée et le pavillon du seigneur de Ternant [estoit] du cousté tirant à la ville, et l'entrée et le pavillon de Galiot fut du cousté opposite, tirant à la porte qui vient de Bellemotte. Et furent ordonnez deux cens souldoyers, par ceulx de la ville, tous armez et embastonnez, qui se tenoient entre les deux lices où furent les pavillons tenduz pour les champions; et fut le pavillon du seigneur de Ternant de drap damas noir et bleu, et sur le capital ses armes1 et son timbre broudé moult richement; et à l'entour des gouttières estoit escript en grosses lettres d'or, en brodure, ung souhait tel : « Je souhaite que avoir puisse de mes désirs « assouvissance et jamais aultre bien n'eusse. » Noblement fut son cousté paré de bannières et de penons. Et pareillement fut le pavillon de Galiot qui fut tendu de soye. Et aussi estoit le camp paré et la double lice plaine de gens d'armes, et la maison où le duc devoit estre moult richement tapissée ; et, environ une heure après midy, se partit le duc de son hostel, accompaigné de monseigneur Charles, conte de Charolois, son filz, du conte d'Estampes, du seigneur de Beaujeu, de monseigneur Adolf de Cleves et de moult grant noblesse ; et celluy jour je chevauchay après le duc sur ung coursier couvert de velours noir. J'estoye encoires son