Ternant : Échiqueté d'or et de gueules de quatre traits

paige, et n'avoit après luy paige ne autre parure que moy et ledit coursier. Le duc descendit en son hourd et tenoit en sa main le baston, comme juge ; et tantost entrèrent dedans la lice huict hommes d'armes moult bien armez, chascun le blanc baston en la main, car ils estoient ordonnez pour escoustes1 et pour deppartir les champions. Et ne demoura guieres que le seigneur de Ternant entra en la lice sur ung cheval couvert de ses armes en brodure, et avoit sa cotte d'armes au doz, et estoit armé de toutes pièces, le bassinet en la teste et la visière ouverte; et certes il avoit ung visage de chevalier, non pas de pucelle, car il estoit brun, à une noyre et forte barbe, et sembloit bien homme à redoubter et à craindre. Il estoit accompaigné du seigneur de Beaujeu et du conte de SainctPol, et descendit si tost qu'il fut en la lice, et pourtoit ung gros court baston en sa main dextre, qui luy rendoit contenance d'homme d'armes et moult bien luy seoit. Il ne porta point de bannerolle de devocion, laquelle chose je ne prise point, car plus est l'homme de hault affaire, plus doit à Dieu de recongnoissance, et tant plus a d'honneur, tant plus doit doubter et craindre celluy Dieu, qui le luy peut oster et faire perdre. Ainsi se présenta le seigneur de Ternant moult humblement devant le duc et porta luy mesme la parolle, et bien le seut faire, et le duc le bienviengna, et se retrait en son pavillon. Ne demoura guieres que Galiot de Baltasin entra en la lice, et l'accompaignoit le conte d'Estempes. Il estoit armé de tout, fors de la teste, la cotte d'armes au doz, et seoit sur ung cheval couvert de ses armes.