Estans les champions

paignon de la pointe de l'espée par le dessoubz de l'armet, tirant à la gorge, sous les aisselles, à l'entour du croisant de la cuirasse, par dessoubz la ceingnée du bras, à la main de la bride, jusques à bouter son espée entre la main et la bride, tant que ladicte espée passoit oultre une poignée, et partout le trouva si bien armé et pourveu que nulle blessure n'en advint, et ainsi furent prins. Et gecta le duc le baston et furent amenez devant le duc, les visières levées, et requirent tous deux que s'ilz n'avoient accompli les trante et un coups contenuz es chappitres, qu'ilz estoient prestz de les accomplir. Le duc leur dit qu'il estoit content d'eulx et les fit toucher et embrasser ensemble, et ainsi furent icelles armes achevées, qui furent dures et de grande extime, et depuis festoya le bon duc Galiot de Baltasin et le feit seoir à sa table et luy donna de grans dons, et s'en retourna devers le duc de Millan, son maistre.

Assez tost se partit le duc de Bourgoingne de sa ville d'Arras et visita le pays de Flandres et de Brabant ; et sur l'arriére saison le duc se tira en son pays de Zeellande, pour tenir le Viescaire, qui est comme le parlement du pays, et ne se peust tenir qu'en la présence du conte de Zeellande ou de son aisné filz. Et là fît faire le duc grans exploitz de justice. Dont il advint que grans plainctes vindrent d'un escuyer de grant lignaige du pays, nommé Jehan de Dombourc, et le chargeoit on d'efforcé mens, de battures, d'affolures de sergens et d'officiers, de rançonnemens, de murdres et de composicions, et ordonna le duc qu'il fust prins. Mais quant il fust adverti que justice le cherchoit pour le prandre, il gaigna le clochier de l'église des Corde-

liers en la ville de Middelbourg en Zeellande, et se fortiffia et avictailla avec cinq ou six de ses serviteurs, tellement qu'il le convint assiéger, et se tint trois jours, combien que, pour l'honneur de l'église, il ne fut assailli ne n'y fut tiré ung cop d'arbaleste ne autrement. Et me souviens que je veiz une nonnain venir devers ledit Jehan de Dombourc, qui par plusieurs fois crioit à son frère qu'il se fist tuer plus tost en soi deffendant, que de faire telle honte à son lignaige que de cheoir en main du bourreaul. Touteffois ledit de Dombourc se rendit à la voulenté du prince, et fut son procès faict, et finablement il eut la teste tranchée sur le marché dudit Middelbourg ; mais, à la requeste et poursuytte de ladicte religieuse, sa seur, le corps luy fut délivré et enterré en terre saincte. Moult d'aultres justices fît faire le bon duc en son pays de Zeellande, et environ le septembre revint le duc en sa ville d'Anvers, où la feste commençoit, qui est en celluy temps. Mais, au partir de Bergues sur le Soin, le duc print dix ou douze de ses privez, et en assez petite compaignie, sans soy faire congnoistre, alla faire un pelerinaige de Nostre Dame d'Ais en Allemaigne. Et durant ce temps ceulx de son conseil rompirent le tinel de la salle, et la grant mangeaille et extresme despense qui se faisoit journellement en l'hostel du duc de Bourgoingne, et furent mis tous ceulx de celle court à gaiges et à argent, et fut lors que Michaut le retoricien dist que le gigot de la court estoit rompu.

[Depuis] revint le duc au lieu d'Anvers, où il trouva la duchesse, son espouse, et là fit on banquectz et grans chieres, pour ce que le temps estoit oyseulx, et n'estoient nulles nouvelles de guerre . Pourquoy voyageoient

nobles hommes estrangiers de lieu en aultre, pour eulx faire congnoistre. Et advint que en icelluy temps arriva en la ville d'Anvers ung chevalier du royaume de Castille, serviteur du duc de Millan, Philippe Maria, et se nommoit messire Jehan de Bonnyface. Celluy chevalier envoya devers le duc pour lui supplier qu'il lui donnast congié de porter emprinses d'armes en ses pays et en sa court, et le duc, qui veoit voulentiers telles nobles execucions, le luy accorda libéralement. Si leva ledit chevalier une emprinse telle, qu'il portoit sur sa jambe senestre un fert d'or dont il estoit enferré, qui le prenoit au bas de la jambe, et estoit soubstenu celluy fert d'une chaisne d'or, qui se prenoit au long de la jambe de dehors, et dessus le genoil avoit une main, yssant d'une nuhée, qui tenoit ladicte chaisne. Et, prestement que l'emprinse fut choisie, accoururent nobles1 de toutes parts devers le duc pour avoir congié de lever icelle emprinse ; mais Jaquet de Lalain, qui, de longue main, avoit queru et désiré son party pour soy esprouver en celle noble espreuve, poursuivit2 avant tous aultres, et fit tant que le duc lui ouctroya celle fourniture. Si fut le chevalier mandé devers le duc, et, pour abréger, toucha à son emprinse ledit Jaquet de Lalain; et pour ce que le chevalier desiroit que brief jour luy fust assigné, luy fut ordonné et assigné au quinziesme3 jour de novembre4 suyvant, en la ville de Gand, qui estoit le quatriesme jour après que la feste de la Thoison se debvoit tenir en ladicte