Guillaume Fillastre

célébrée, les chevaliers s'en retournarent comme ilz estoient venus et se retirarent en leur chambre de conseil, et tandis fut le disner apresté. Et là fut dressée une moult grande table toute couverte et adossée d'ung velours noir broudé de fusilz et des armes du duc de Bourgoingne, moult richement, et au senestre cousté avoit une plus basse table, qui fut ordonnée pour les quatre officiers de la Thoison. Le disner prest, les chevaliers revindrent, et lavèrent les deux ducz ensemble, et se seit le duc de Bourgoingne au mellieu de la table, et à son dextre lez1 le duc d'Orléans, et au senestre le seigneur de Santés, et se seirent les aultres chevaliers par ordre. Les deux ducz furent serviz à couvert, chascun à par soy, et pareillement furent serviz tous les chevaliers, chascun son plat et son service à part, et furent moult grandement serviz de vins et de viandes. Et à la basse table se seit le chancelier, le trésorier, le greffier et le roy d'armes, qui pareillement furent serviz, et chascun à par eulx, comme les chevaliers. Longuement dura le disné et le service. Là jouarent et sonnarent menestriers et trompettes, et heraulx eurent grans dons et criarent largesse. Et, tables levées, furent les espices appointées, et furent les princes et les chevaliers serviz d'espices et de vins, et puis se retraïrent les chevaliers en leurs chambres; et, sur le point de trois heures, revindrent vestuz de robes et longs manteaulx noirs, et chascun le collier de l'ordre au col, et les quatre officiers furent vestuz de mesme, montarent à cheval en l'ordre accoustumée et allèrent à l'église ouyr