Matelots

faictz et eslevez parmi les navires, et tout au plus près du vif que on pouvoit faire la semblance d'une carracque ou d'ung grant navire.

« Item, sur lesdictes tables avoit trante grans pastez couvers de différantes couvertures, en manière de haultz chasteaux eslevez, tous paintz d'or et d'asur, à grandes bannières de mondit seigneur de Bourgoingne ; et sur chascung chasteau avoit les armes et le nom d'une bonne ville de mondit seigneur; et ainsi fut monstre trante principaultez et seigneuries de l'heritaige de mondit seigneur le duc, et trante villes à luy subgectes, les non pareilles du monde.

« Item, pour la parure d'icelles tables, avoit à l'entour de chascune nef quatre botequins chargez de fruictaille et espiceries moult richement estoffez.

« Item, furent icelluy jour présentez trois entremectz mouvans , dont Fung et le premier s'ensuyt.

« Premièrement entra dedans la salle une licorne grande comme ung cheval, toute couverte d'une couverture de soye paincte aux armes d'Angleterre ; et dessus icelle licorne avoit ung liepart moult bien faict, auprès du vif. Celluy liepart avoit en sa main senextre une grant bannière d'Angleterre, et à l'aultre main une fleur de marguerite moult bien faicte ; et après que à son de trompettes l et de clairons ladicte licorne eust faict son tour devant les tables, on l'ammena devant mondit seigneur le duc, et là ung des maistres d'hostel d'icelluy seigneur, à ce ordonné, print ladicte fleur de marguerite es mains dudit liepart, et se vint adgenoiller devant mondit seigneur, et luy dit telles parolles :