Chocs, rencontres

Carondelet, son chancellier, l'abbé de Sainct Bertin, chancellier de son ordre, noble homme, et de ceulx de Lannoy, messire Martin de Polhem et messire Wolfart de Polhem, Philippe, conte de Nassau, et messire Jaspart May, Allemans, et du privé conseil de cestuy noble Roy, le seigneur de Mingoval, son grant maistre d'hostel, messire Jehan de Jaucourt, seigneur de Villarnou, et messire Philippe Loete, seigneur d'Aresches, tous chambellans et maistres d'hostel du Roy. Et povez entendre et croyre que toutes et quantes fois qu'il souvenoit à ce bon Roy de la soufferte et dangier d'iceulx ses serviteurs, il avoit le cueur bien pressé et bien desplaisant; mais toutefïois ce Cueur d'acier demeura tousjours en la bonne espérance et fiance de Dieu, et tant endura et actendit sa meilleure fortune qu'il eschappa de ce dangier, et luy et ses serviteurs dessusditz. Ces choses considérées, je demeure en ceste oppinion qu'il a le cueur aussi fort et aussi ferme que d'acier, et je le espreuve 1 par experiment.

Or est besoing que je reviengne à parler et à escripre du fait de monseigneur l'archiduc Philippe, son filz, et commenceray par luy donner surnom acquis jusques à présent. Le duc Philippe, filz du Roy de France, fut nostre premier duc deppuis le temps que le Roy Philippe de Valois2 succéda à ladicte duchié, par estre yssu d'une fille de Bourgoingne ; et luy vint la succession par femme, comme il est assez notoire et publicq par tout le monde. Ce duc Philippe fut surnommé Philippe le Hardy pour les raisons que j'ay