PRESOMPTION DE L'HOMME
Que nous presche la Vérité, quand elle nous presche de fuyrla mondaine philosophie ; quand elle nous inculque si souvent Que notre sagesse n'est que folie devant Dieu; Que de toutes les vanitez, la plus vaine c'est l'homme; Que l'homme, qui présume de son sçavoir, ne sçait pas encores que c'est que sçavoir; et Que l'homme, qui n'est rien, s'il pense estre quelque chose, se seduict soy mesme et se trompe? ces sentences du sainct Esprit expriment si clairement et si vifvement ceque jeveulx maintenir, qu'il me fauldroit aulcune aultre preuve
contre des gents qui se rendraient avecques toute soubmission et obéissance à son auctorité. Considérons doncques pour cette heure l'homme seul, sans secours estrangier, armé seulement de ses armes, et despourveu de la grâce et cognoissance divine, qui est tout son honneur, sa force, et le fondement de son estre : veoyons combien il a de tenue en ce bel équipage. Qu'il me face entendre, par l'effort de son discours, sur quels fondements il a basty ces grands advantages qu'il pense avoir sur les aultres créatures : Qui luy a persuadé que ce bransle admirable de la voulte céleste, la lumière éternelle de ces flambeaux roulant si fièrement sur sa teste, les mouvements espoventables de cette mer infinie, soyent establis, et se continuent tant de siècles, pour sa commodité et pour son service ? Est il possible de rien imaginer si ridicule, que cette misérable et chestifve créature, qui n'est pas seulement maistresse de soy, exposée aux offenses de
toutes choses, se die maistresse et emperiere de l'univers, duquel il n'est pas en sa puissance de cognoistre la moindre partie, tant s'en fault de la commander? Et ce privilège qu'il s'attribue d'estre seul en ce grand bastiment, qui ayt la suffisance d'en recognoistre la beaulté et les pièces, seul qui en puisse rendre grâces à l'architecte, et tenir compte de la recepte et mise du monde; qui luy a scellé ce privilège? Qu'il nous montre lettres de cette belle et grande charge.
La presumption est nostre maladie naturelle et originelle. La plus calamiteuse et fragile de toutes les créatures, c'est l'homme, et quant et quand la plus orgueilleuse : elle se sent et se veoid logée icy parmy la bourbe et le fient du monde, attachée et clouée à la pire, plus morte et croupie partie de l'univers, au dernier estage du logis et le plus esloigné de la voulte céleste, avecques les animaulx de la pire condition des trois; et se va plantant, par imagination, au
dessus du cercle de la lune, et ramenant le ciel soubs ses pieds. C'est par la vanité de cette mesme imagination, qu'il s'eguale à Dieu, qu'il s'attribue les conditions divines, qu'il se trie soy mesme, et sépare de la presse des aultres créatures.
