LE CIEL

Quand Mahumet promet aux siens un paradis tapissé, paré d"or et de pierreries, peuplé degarses d'excellente beaulté, de vins et de vivres singuliers : je veois bien que ce sont des mocqueurs qui se plient à nostre bestise, pour nous emmieller et attirer par ces opinions et espérances, convenables à nostre mortel appétit. Si sont aulcuns des nostres tumbez en pareil erreur, se promettants, aprez la résurrection, une vie terrestre et temporelle, accompaignee de toutes sortes de plaisirs et commoditez mondaines.

Quand touts mes cinq sens de nature seroient combles de liesse, et cette ame saisie de tout le contentement qu'elle peult désirer et espérer, nous sçavons ce qu'elle peult ; cela, ce ne seroit encores rien : S'il y a quelque chose du mien, il n'y a rien de divin : Si cela n'est aultre que ce qui peult appartenir à cette nostre condition présente, il ne peult estre mis en compte; tout contentement des mortels est mortel. Nous ne pouvons dignement concevoir la grandeur de ces haultes et divines promesses, si nous les pouvons aulcunement concevoir; pour dignement les imaginer, il les fault imaginer inimaginables, indicibles et incompréhensibles, et parfaictement aultres que celles de nostre misérable expérience. Œil ne sçaurait veoir, dict sainct Paul, et ne peult monter en cœur d'homme, l'heur que Dieu prépare aux siens.

C'estoit vrayement bien raison que nous feussions tenus à Dieu seul, et au bénéfice de

sa grâce, de la vérité d'une si noble créance, puisque de sa noble libéralité nous recevons le fruict de l'immortalité, lequel consiste en la jouissance de la béatitude éternelle. Confessons ingénument que Dieu seul nous l'a dict, et la foy; car leçon n'est ce pas de nature et de nostre raison : et qui retentera son estre et ses forces, et dedans et dehors, sans ce privilège divin; qui verra l'homme sans le flatter, il n'y verra ny efficace ny faculté qui sente autre chose que la mort et la terre. Plus nous donnons, et debvons, et rendons à Dieu, nous en faisons d'autant plus chrestiennement.