DEFAILLANCES DU CLERGÉ

II faut considérer le presche à part et le prescheur à part.

Ceulx là se sont donné beau jeu en nostre temps, qui ont essayé de chocquer la vérité de notre Eglise par les vices de ses ministres ; elle tire ses tesmoignages d'ailleurs : c'est une sotte façon d'argumenter, et qui rejecteroit toutes choses en confusion , un homme de bonnes mœurs peult avoir des opinions faulses ; et un meschant peult prescher vérité, voire celuyqui ne la croit pas. C'est sans doubte une belle

harmonie, quand le faire et le dire vont ensemble : et je ne veulx pas nier que le dire, lors que les actions suyvent, ne soit de plus d'auctorité et efficace.

Tel estant allé à Rome, y voyant la dissolution des prélats et peuple de ce temps là, s'establit d'autant plus fort en nostre religion, considérant combien elle debvait avoir de force et de divinité, à maintenir la dignité et sa splendeur parmy tant de corruption et en mains si vicieuses.