L'EUCHARISTIE

Il m'a tousjours semblé qu'à un homme chrestien cette sorte de parler est pleine d'indiscrétion et d'irrévérence : « Dieu ne peult mourir; Dieu ne se peult desdire; Dieu ne peult faire ceci ou cela ». Je ne trouve pas bon d'enfermer ainsi la puissance divine soubs les loix de nostre parole : et l'apparence qui s'offre à nous en ces propositions, il la fauldroit représenter plus reveremment et plus religieusement,

Veoyez comment on se prevault de cette sorte de parler, pleine d'irrévérence : aux dis-

putes qui sont à présent en nostre religion, si vous pressez trop les adversaires, ils vous diront tout destrousseement qu' « Il n'est pas en la puissance de Dieu de faire que son corps soit en paradis et en la terre, et en plusieurs lieux ensemble ».

L'homme ne peult estre et au ciel, et en la terre, et en mille lieux ensemble corporellement : c'est pour toy qu'il a faict ces règles ; c'est toy qu'elles attachent : il a tesmoigné aux chrestiens qu'il les a toutes franchies, quand il ]uy a pieu. De vray, pourquoy, tout puissant comme il est, auroit il restreinct ses forces à certaine mesure?