CONCESSIONS INUTILES

Ce qui me semble apporter autant de desordre en nos consciences, en ces troubles où nous sommes de la religion, c'est cette dispensation que les catholiques font de leur créance. Il leur semble faire bien les modérez et les entendus, quand ils quittent aux adversaires aulcuns articles de ceulx qui sont en débat ; mais, oultre ce qu'ils ne veoyent pas quel advantage c'est à celuy qui vous charge, de commencer à luy céder et vous tirer arrière, et combien celai l'anime à poursuyvre sa poincte ; ces articles, là, qu'ils choisissent pour les plus legiers, sont

aulcunesfois tresimportants. Ou il faut se soubmettre du tout à l'auctorité de nostre police ecclésiastique, ou du tout s'en dispenser : ce n'est pas à nous à establir la part que nous luy debvons d'obeïssance. Et davantage, je le puis dire pour l'avoir essayé, ayant aultrefois usé de cette liberté de mon chois et triage particulier, mettant à nonchaloir certains poincts de l'observance de nostre Eglise qui semblent avoir un visage ou plus vain ou plus estrange ; venant à en communiquer aux hommes sçavants, j'ay trouvé que ces choses là ont un fondement massif et tressolide, et que ce n'est que bestise et ignorance qui nous faict les recevoir avecques moindre révérence que le reste.