LA FOI SANS LES ŒUVRES

Je ne loue pas volontiers ceulx que je veois prier Dieu plus souvent et plus ordinairement, si les actions voisines de la prière ne me tesmoignent quelque amendement et reformation. Et l'assiette d'un homme meslant à une vie exsecrable la dévotion, semble estre aulcunement plus condemnable que celle d'un homme conforme à soy, et dissolu partout : pourtant refuse nostre Eglise touts les jours la faveur de son entrée et société aux mœurs obstinées à quelque insigne malice.

Nous prions par usage et par coustume,

OU, pour mieulx dire, nous lisons ou prononceons nos prières; ce n'est enfin que mine : et me desplaist de veoir faire trois signes de croix au Benedicite, autant à Grâce; et ce pendant, toutes les aultres heures du jour, les veoir occupées à la haine, l'avarice, l'injustice : aux vices leur heure; son heure à Dieu, comme par -compensation et composition. C'est miracle de veoir continuer des actions si diverses, d'une si pareille teneur, qu'il ne s'y sente poin d'interruption et d'altération, aux confins mêmes et passage de l'une à l'aultre. Quelle prodigieuse conscience se peult donner repos, nourrissant en mesme giste, d'une société si accordante et si paisible, le crime et le juge?