PAULIN

Je cuide que très-bien fera, Cest négoce Domicien Qui est sage et loyal païen , Noble homme et de belle manière.

FESCENNÏN.

Il est digne d'estre emperière Et croy que chascun s'y acorde.

MASQUEBIGNET, MENJUMATIN, HUMEBROUET, HAPELOPIN.

Sire, nully ne s'en descorde.

AGRIPPE

Domicien , levez la main.

Vous jurez l'empire Rommain Garder, deffendre et soustenir , Les loys et libertez tenir Que les sages seigneurs ont mises.

domicien , en levant la main.

G'y mectray paine en toutes guises.

PAULIN, en ly baillant.

Tenez la couronne royal Comme seigneur bon et loyal, Tenez le mantel et l'espée.

En vostre empire longue et lée Justice faictes à tout homme.