LE CARDINAL D'AMBOISE AU ROI DE CASTILLE

Remontrances et conseils. [Copie du temps.) Août.

Sire, j'ay receu deux paires de lettres de vous, dont l'une est escrite de vostre main, et vous mercie très- humblement de la peine que vous en a pieu prendre. Et au regard, sire, de ce que vous plaist dire que le Roy mon maistre, par ce que vous a escrit Courteville vostre ambassadeur, vous veut faire la guerre en Gueldres, et que je veille tenir la main , quant à ce, que l'amytié d'entre vous deux se entretienne, autrement si on fait le contraire, vous protestés contre ledit seigneur de tous les maux que en adviendront et que le péché en sera sur luy et sur moy, pour ce que je y puis remédier, si je veux, ainsy qu'il vous plaist dire.

Sire, je ne veux autre juge que vous de ce que je y ai fait par cydevant et la peine que j'ay prise pour entretenir l'amytié de vous

deux , et le désir que j'ay toujours eu à vous fere service, et vous ay tousjours dit que, là où à mon honneur je vous pourrois fere service , me trouverics toujours vostre serviteur.

Sire, vous entendes bien de combien je suis tenu et obligé au roy mon maistre, car, outre l'obligation naturelle qui est de souverain seigneur à subject et serviteur, il m'a fait tant de biens et de honneurs que je serois le plus ingrat homme du monde si je ne le servois ainsy que je y suis tenu et obligé ; et quant autrement je le voudrois faire, il n'en feroit rien pour moy.

Touttesfois, sire , ne pensés pas que je ne luy en aye parlé par plusieurs fois et mesmes de ce fait de Gueldres; et la response a esté qu'il veult entretenir l'amytié de vous deux, et que par luy ne demeurera; mais de lesser destruyre ses alliez et serviteurs, qu'il ne le souffriroit point. Et dit ledit seigneur qu'il le vous a toujours fait dire, et qu'il vous prioit ne luy courre sus; autrement il faudroit qu'il s'en meslàt; et m'a- dit ledit seigneur plus avant qui sembleroit, veu que vous délibérez de destruyre totalement son serviteur et parent; que, cela fait, voulissiez entreprendre autre chose sur luy, attendu que, depuis votre partement de Flandres, avés fait des aliances directement contre celle que aviés faite avecques moy ; et d'autre part, le roy vostre père n'a cessé envoyer par l'Italie pratiquer tout plain de choses contre l'amytié faite à Agueno , semblablement aux Suisses, et croy qu'il s'en trouveroit quelque chose par écrit.

Sire, tourtes ces choses font penser beaucoup de gens; et, pour Dieu, ostons toutes matières qui puissent donner imagination et vivons en paix. Et il vaut mieux avoir ung peu moins en bonne seureté que en mettre plus que de ce que est question en danger.

Sire, pardonnés-moy si je vous escris si longue lettre; car la matière dont m'aviés escrit est si grosse que ne vous eusse sceu respondre à moindre lettre , vous suppliant que, si avés deux bandes en vostre conseil dont l'une veille la paix et l'autre la guerre, croyés cem de la paix et vous en trouvères bien.

Sire, je prie à notre Seigneur, etc. G cardinal d'Amboise.