AU ROY

Sire , Loys Rosequs, Pierre Hurtado et Gaspardo Andes, espagnols et serviteurs du marquis de Valangre , remonstrent très-humblement à vostre majesté, comme au mois de may de l’an xv' cinquante-huict ils furent prins prisonniers par trois navires de Sainct-Malo, et après avoir longuement combattu se rendirent à condition qu’ils s’en iroient francs et quittes en leurs pays, comme aucuns feirent et quasi tous, sauf huict qui furent blesses en combatant, lesquels demeurèrent aucuns jours à Blanvette pour se faire guérir de leurs plaves , et estant guéris et ayant passe-port pour eulx en aller en leurs pays, vint ung commissaire de vostre majesté, nommé Mota, lequel leur osta ledit passe-port, et nonobstant icelluy les mena au chaste! de Nantes , où ils sont encore détenus présentement et fort mal traictez. Ce considéré et aussi qu'il est traicté que prisonniers prins sur mer ne payeront aucune rançon, ils supplient très-humblement vostre majesté que le bon plaisir d’icelle soit de commander au capitaine de Nantes de les laisser aller librement en leurs pays. Et ils prieront le Créateur pour la bonne santé et prospérité d'icelle, et sera équité et raison.