DESCENDANTS DE JACQUES BOUJU

son, sont décédés. Leurs successions sont expertisées et partagées en deux lots entre « d lle Jacqueline Bouju, veufve de deffunct Jacques de Villaumont, vivant chevalier, gentilhomme ordinaire de la chambre du Roy, seigneur dudit lieu et de la Fourmondière, ladite d lle représentant deffunct Michel Bouju, vivant escuyer, seigneur de la Sorinière, conseiller du Roy en sa court de Parlement de Bretagne, frère aisné dudit deffunct Guillaume Bouju, seigneur de la Madelaine, et de ladite deffuncte d lle Bouju, et Jean de Tessé, escuyer, seigneur de Margot et de Tessé, et d lle Catherine de Quentin, son espouse, et René de Champagne, escuyer, seigneur de la Pommeraye, père et garde noble des enfants de luy et de deffuncte d 1,e Charlotte de Quentin, vivante sa femme, les dits Quentin représentant d lle Rose Bouju, leur mère, sœur puisnée desdits deffuncts sieur de la Madelaine et Marguerite Bouju, dame de la Grandmaison. » A ces partages n'avait pas été appelé Pierre de Quentin, sieur de la ïavenchère, qui était fils de Rose Bouju. Ses enfants réclamèrent plus tard, et une transaction intervint. Il n'est pas nécessaire d'entrer ici dans ce détail. Il suffit de constater que dès 1636 il n'y avait plus de descendant mâle du frère du président Bouju 1 .

1 Archivesde Maine-et-Loire, E, 1771, 3 me , 5 me et 6 me pièce.

Au très puissant, très vertueulx et très chrestien roj Henry, deuxième de ce nom, Jacques Bouju, son très obéissant serviteur.

« Sire, les anciens modérateurs et gouverneurs des empires, royaulmes et républiques, congnoissans les espritz des mortelz ne povoir estre incitez à vertu par plus vif et urgent esguillon que par la gloire, advisèrent de non seullement honorer les vertueux de triumphes, coronnes et aultres pris louables et exquis, mais, pour plus longuement conserver la mémoire de leurs beaulx faictz, leur érigèrent statues, trophées et arcs triumphans. Ce qu'ilzfeiréntpour la certaine opinion qu'ilz avoient que le vray loier de vertu, c'est la gloire : laquelle tout ainsi qu'elle peut demourer pour quelque temps es colonnes et aultres ouvrages faictz par la main qu'ilz appelaient monimens, aussy elle a perpétuel et asseuré domicile es œuvres immortelles des excellens historiens. Ce que bien entendit Alexandre le grand,

prince de hault cueur et esprit eslevé. Quant aiant passé l'Hellespont pour aller à la conqueste de l'Asie, et estant au lieu auquel pour lors se pouvoient encores veoir quelques ruines de la fameuse Troie, il se feit mener au sépulchre d'Achilles. Duquel il n'admira ne la riche structure, ne la beauté de l'ouvrage, sachant cela fragile et de petite durée, mais avecques souspirs s'écria : O jeune homme bien fortuné, quant en ta vie tu as eu si grand heur que d'avoir ung tant fidèle amy, et après ta mort telle et si claire trompette de tes louanges. Entendant Patroclus pour le premier, et le poète Homère pour Je second : qui n'avoit à aultre fin faict l'excellente entreprise de l'Iliade, sinon pour consacrer la mémoire d'Achilles à immortalité. Mais tout ainsy que la nayfve couleur d'une beauté non affaitée est plus belle, plus vraye et plus durable que celle d'un visage orné d'un fard mensonger; aussy le tesmoignage donné par l'histoire est trop plus honorable, vray et de plus certaine durée que celuy qui vient de la forge de poésie. Laquelle comme chose feincte et controuvée à plaisir nous figure et taille seullement une image des personnes, non telz qu'ilz furent, mais qu'ilz dévoient estre. L'histoire au contraire nous laisse les beaulx portraictz retirez- après le vif des personnages tels qu'ilz ont esté en leur vie. Pour raison de

quoy Cicero, ce grand orateur, l'appelloit tesmoing du temps, lumière de vérité, vie de mémoire, et messagère de l'antiquité : L'aiant en telle admiration qu'il disoit ceulx-là estre tousjours enfans, qui n'avoient congnoissance des faictz et des choses advenues auparavant leur siècle.

L'histoire est celle en laquelle, comme en ung tableau publiquement proposé, nous voions la vie et faictz des Roys et princes vertueux et des peuples et personnages excellens, pour entendant leurs conseilz, entreprises et événemens d'icelles , en prendre tout ainsi que d'un singulier patron, exemples et enseignemens pour donner ordre et pourvoir aux affaires tant publiques que privées. Car si sapience, comme disoit Afranius, n'est engendrée que par usage, et n'a aultre mère que mémoire, combien doit sur tous mortelz celuy estre réputé sage, qui a enrichi son esprit des faictz et meurs non d'un aage et temps, non d'une ville et région, mais de tous siècles, pays et nations. Et combien quelle temps, ainsy que remonstroit Fabius le cunctateur à ^milius allant contre Annibal, nous rende au fil des ans plus sages, constans et avisez : si est ce un cas digne de grande admiration, povoir, sans attendre ceste longue et tardive expérience que les jours apportent avecques soy, par le

bienfaict de la lecture, prévenir et anticiper ceste prudence, et entendre la raison et yssue des choses par le péril et danger d'aultruy. Pour laquelle considération, ce gentil empereur Romain, Alexandre, filz de Mamea, voulant mettre quelque affaire importante en délibération, appelloit sur tous et prenoit le conseil de ceulx qui avoient congnoissance des histoires et antiquité. Or estant les choses humaines subjectes et asservies à cent mille inopinées mutations, et, comme un flot de mer, conduites ou plus tost violentement menées maintenant de ça, maintenant de là : par quel moien se peuvent-elles asseurer, sinon par la prudence d'un bon prince et gouverneur qui ne se peut en meilleure eschole exerciter ne instruire qu'en l'histoire nous proposant les beaulx et riches exemples des Roys et capitaines anciens, en la vertu desquelzil pourra, comme en cler et luisant miroer, composer soy, sa vie et république. Et ne fault en rien doubter, que les princes et excellens personnages dont l'antiquité est tant riche et recommandée, n'eussent jamais eu tel et si ardent désir de la congnoissance des lettres et histoires, s'ilz n'y eussent veu une grande utilité et gloire conjoincte avecques le plaisir. Car pour quelle aultre raison mena Alexandre le Grand avecques luy Anaxarchus et Calisthènes, excellens philosophes, en si

loingtain et tant périlleux voiage; pourquoi avoit-il tousjours Homère soubz le chevet de son lict, sinon pour estre par la leçon enflammé du désir d'entreprendre haultes choses et par icelle instruict à sagement les conduire. A l'exemple duquel, comme ung chacun prendz volontiers patron de ses meurs sur celles du prince, tous les gentilzhommes de sa maison, s'adonnans à l'estude entre la fureur des armes, oyoient à leur loysir les belles et sainctes leçons de philosophie. De sorte que Lisimachus, l'un de ses chambellans et depuis Roy par sa vertu, façonné en telle eschole, et, pour avoir faict faveur à son précepteur, présenté à un fier lyon par la cholère de son maistre, ne perdit l'esprit, mais comme celuy qui bien congnoissoit le naturel de cette beste par le bénéfice des lettres, l'attendit hardiment sans aultres armes que la cappe et par grand addresse luy aiant lancé la main dans la gueule, l'estrangla et meit à mort. Les Athéniens, seigneurs de bien peu de pays, et quasi d'une petite poignée de terre, par quelle aultre industrie ou force eussent ilz mis à fin tant de haultes et glorieuses entreprises, si Pallas leur fondatrice, c'està-dire Prudence et Scavoir, ny eussent mis la main ? Par le moien desquelz il leur fut facile entreprendre et exécuter les choses surpassans du tout leur puissance. Delà, comme du cheval

de Troie, sortit ung milion cTexcellens personnages plains de sçavoir et chevalerie, Thémistocles , Thucidides , les gentilz Alcibiades et Périclès, le vaillant et très éloquent Xénophon : lequel par ung seul faict laissa très certain enseignement à la postérité, combien la congnoissance des lettres est non seullement profitable, mais nécessaire à un chef et capitaine. Car voiant dix mille souldars du pays de Grèce environnez de la puissance du Roy Artaxercès au plus avant de l'Asie, après leur avoir par son éloquence faict reprendre cueur qu'ils alloient en tel désespoir du tout abandonner, il feit tant que maulgré la force des Perses, il saulva et conduisit les siens jusques dans la Grèce par l'espace de douze cens lieues et plus : combatant jour et nuict non seullement contre superbes et belliqueux ennemys qui se trouvoient en tous endroicts, mais contre cent mille difficultez de lieux inaccessibles, de montagnes et rivières à tout aultre insupérables : lesquelles toutesfois il surmonta par son esprit, sens et conduite. Les Romains semblablement n'eurent jamais leurs armes plus craintes ne redoutées que lorsqu'ilz receurent la clarté des disciplines et lettres : auxquelles ilz déféroient tant qu'ilz ne faisoient aucune difficulté bailler la charge d'une grosse et puissante armée à ung jeune gentilhomme encores qu'il fust

peu expérimenté, pourveu qu'il eust l'esprit adroict, et exercité en la cognoissance des choses antiques : sachans que la victoire consiste non au bras et vaillance d'un chef, mais en sa prudence et bonne conduyte. Et qu'il n'est rien plus pestilent ne dangereux en une République (comme disoit ce divin Platon) que témérité et audace accompagnée d'ignorance. De sorte que Scipion, aagé seullement de xxmi ans, après la mort de son père et oncle deux très vaillans capitaines, deffaictz en Espagne par les Chartaginois, osa demander au peuple Romain la charge de ceste tant difficile et périlleuse guerre. Ce que

luy estant révoqué en doubte, tant pour

Ici le manuscrit présente une lacune ; un feuillet a été enlevé. Bouju, par une transition facile, y était sans doute venu à l'éloge de François I er dont voici la fin :

« En quoy il avoit toute sa vie pris telle délectation et tant profitté, que avecques ceste perfection de corps auquel nature n' avoit rien oublié, avecques ceste plus que Royale majesté, et haultesse de cueur, il avoit par la lecture tant embelly et illustré l'excellence de son esprit, et grâces sur toutes admirables, que par là surpassant tous les Roys de son temps, il s'estoit faict égal au plus renommé de toute l'antiquité. De sorte qu'on ne povoit en luy aultre chose sou-

haiter, sinon fortune pareille à si haultain mérite. Laquelle toutesfois par le bien et moien des lettres il a tousjours porté tant dextrement, qu'en faveur et défaveur on la peu veoir de mesme visage et constance ; mettant à exécution la belle sentence de Platon disant qu'il fault, en ceste vie humaine, faire tout ainsi qu'au jeu du tabler, c'est assavoir corriger par industrie ce que le sort a malheureusement amené. Brief il a esté le premier de tous ceulx qui ont commandé sur la France, qui, chassant ignorance et faisant voir aux siens le cler jour de doctrine et congnoissance de tous ars et disciplines, nous a représenté l'heureux règne des Antonins qui, pour la grande recommandation de leur bonté et sçavoir, eurent le beau nom de philosophes. C'est celuy qui a faict véritable la divine prédiction que les républiques seroientlors heureuses, quant ou les Roys seroient amateurs de sapience, ou les amateurs de sapience régneroient.

« Et vous, Sire, qui par le passé nous aviez monstre espérance d'un si grand bien, estimant et honorant les espritz, maintenant comme vray héritier, non seullement du sceptre paternel le plus glorieux et puissant de sur la terre, mais de ses vertu et grâces, nous en avez donné très certaine asseurance par deux parolles dignes d'immortalité. L'une, quant il vous pleust dire

que feriez tel et semblable traictement aux lettres et lettrez que vostre feu très vertueux père avoit faict, et mieux, s'il vous estoit possible. L'autre, quant vous distes que prendriez à trop plus grand plaisir luy voir donner louange qu'à vous-mesmes ; quoy faisant vous avez tout à ung coup déclaré, et, comme l'escler fendant la nue et se manifestant de l'orient et de l'occident, faict congnoistre à tout le monde que ceste grand' et louable obéissance que luy avez durant sa vie porté, ne procédoit d'aultre source que d'une incomparable vertu et humanité ; quant après sa mort, en la chose dont les plus estimez princes ont tousjours esté jaloux à l'oultrance, pour laquelle seulle ils ont faict les haultes et périlleuses entreprises d'armes, et que personne ne veult communiquer à aultruy, vous estes tant démis et vaincu par une plus qu'humaine piété, que de la vouloir céder à la mé- . moire de vostre père ; par lequel tant recommandable faict, vous avez jà commancé à glorieusement surpasser le plus grand Roy que la Grèce ne toute l'antiquité aient jamais eu, c'est Alexandre le Grand, lequel, du vivant de son père le roy Phelippes, jà bien fort se faschant de l'honneur et gloire qu'il acquéroit par les faictz qu'il mettoit à fin, tant s'en falut, icelluymort, qu'il les voulust ou conserver ou accroistre qu'il

meit à mort de sa propre main le plus grand de ses amys, qui, en sa présence, s'efforçoit de le faire. Que povons-nous doncques doresnavant espérer de vous, Roy heureusement nay, sinon tout bien et félicité ? Vous voyant parfaictement orné de toutes les vertu et grâces requises en un bon prince ; vous voyant en ceste belle fleur de vos ans avoir tant de commandement sur les affections humaines auxquelles peu des plus parfaictz des siècles passez ont sceu résister, que les aiant comme condemnées et faict mourir en vous, on n'y peut remerquer ung seul point de la licence et de la corruption de meurs que les grandes fortunes ont tousjours apporté avecques elles ; victoire plus glorieuse, plus difficile et plus admirable que de vaincre ung milion d'ennemys. De sorte que si Dieu qui tient le cueur des Roys en sa main, vous y maintient et faict persévérer, il ne nous fault à ce beau commancement de vostre règne vous souhaiter, comme par acclamations on faisoit jadis à l'advénement des empereurs romains, ne la félicité d'Auguste, ne la bonté de Trajan, dont vostre vertu sera perpétuellement accompagnée, mais seullement la fortune que Pompée eut en l'aage auquel vous estes maintenant. Affin que soubz vostre règne nous puissions de plus en plus voir par effect combien la Républicque à qui les Cieulx ont tant faict de

faveur que de luy départir ung sage et prudent gouverneur est trop plus heureuse que celle qui est régie par Y inconstance d'une malaprise et indiscrète commune. Comme il arriva à Rome après qu'on eut chacé les Roys. Ainsy que Ion peust au long congnoistre par le discours du second de Tite-Live, avecques plusieurs belles batailles et mémorables histoires. Lequel, trop bien fortuné, il vous plaira recevoir pour arres de mon service et obéissance perpétuelle envers vostre Majesté, esquelz je mettray pêne toute ma vie amploier les petites forces de ce foible corps et esprit, non en espoir d'aucunement attenter à la satisfaction de ce grand bien que sans aucun mien mérite m'avez faict, me retenant en lieu honorable entre vos obéissans serviteurs ; mais vous laissant par mes labeurs quelque recongnoissance de cette obligation qui tousjours coura sur moy, m'estimer très heureux si mon affectionnée volonté est par vous prise en bonne part et reçeue pour agréable. »