DES SIS MANIÈRES

Devant les riches genz menjul frommage mous, Mes es chambres ans dames est ses désirs saouls.

Or est-il bien réson que je vous praingne à dire, Selonc mon escient, des sis fols la matire; Et s'il estoit nus hom qui m'en vousist desdire, Je le voudroie endroit de ces sis fols eslire.

Del droit fol naturel ferai premier mon conte; S'il avoit la grant rente d'un roiaume par conte, Qui que le despendist, n'en feroit-il jà conte, Mes qu'il éust assez du frommage sanz conte.

De ce fol poez bien et entendre et savoir Que il ne conte rien à grant honor avoir :

Quant a assez mengié, tout met en nonchaloir, De sa folie cuide que ce soit grant savoir.

Fols est qui à tel fol met son entendement, Ainz se doit-on de lui délivrer vistement; Fols est qui à lui tence, ne monstre entendement; Quar li hom qui n'a sens si vit en grant torment.

Du droit fol naturel vous ai dit l'aventure, Or vous lerai de lui, quar il est sanz mesure; Du secont fol dirai, où j'ai mise ma cure, Et lerai de celui qui est fols par nature.

Du mélancoliex ne lerai ne vous die :

Ce sont et roi et conte et gent de seignorie En qui sens et proece doit estre herbregie, Qui plus tost sont entré en grant mélancolie.