T)E FOLS

A cels qui tels genz servent, je lor faz asavoir, S'il vuelent estre en pris et lor amor avoir, Ne lor respondent mie dedenz lor mal voloir, Mes se tèsent tuit coi, si feront grant savoir.

J'ai oï piéçà dire un mot en reprovier :

Nus ne puet gaaignier à son seignor pledier, Ainz doit-on à la foiz à son bon obligier, Si en porra bien croistre s'onor et son loier.

Du mélancoliex vous ai dit mon corage; Sachiez qui trop le blasme il ne fet pas que sage. Du tiers fol vous dirai en qui il a grant rage : C'est li fol orguillex où il a grant outrage.

Fol qui est orguillex, sachiez tout sanz doutance, C'est lin fol anuiex et plains d'outrecuidance ; Sachiez qu'il met sovent cors et âme en balance, De qoi tout son lingnage a honte et reprovance.

Moult a mauvèse tèche hom qui a tel corage :

S'il est et biaus et fors et plains de vasselage Et il sent entor lui qu'il soit fors par lingnage, Tant doit-il avoir mains dedenz son cors outrage.

Des riches et des povres a assez par le monde, Por ce que on lor sueffre et lor folie abonde, Qui les chastieroit, j'otroi que l'en me tonde S'il ne se chastioient de fère honte au monde.

Se uns fols orguillex fet et honte et anoi, Et il bat un preudomme et il li fet desroi,