DELIE

L'architecteur de la machine ronde, Multipliant sa diyine puissance, Pour enrichir la pouvreté du monde Créa François d'admirable prestance :

Duquel voulant demonstrer la constance, Vertu occulte, il l'a soudain soumis Aux faibles mains de ses fiers ennemis. Chose sans lui vraiement impossible.

Puis l'acceptant de ses prouvez amis, L'a remis sus en sa force invincible.

Amour des siens trop durement piteux Cacha son arc, abandonnant la terre.

Délie voit le cas si despiteux, Qu'avec Venus le cherche et le déterre. Garde, luy dist Cypris, qu'il ne t'enferre, Comme aultrefois mon cœur l'a bien prouvé. Je ne crains point si petit arc trouvé, Respond ma dame haultaine devenue :

Car contre moy l'archier s'est esprouvé, Mais tout armé l'ay vaincu toute nue.

MAURICE SCÈVE.

Dans son jardin Venus se reposoit Avec Amour, sa douce nourriture, Lequel je vis, lorsqu'il se deduisoit*, Et l'aperçus semblable à ma figure :

Car il estoit de très basse stature.

Moi très petit; lui pasle, moi transi.

Puisque pareils nous sommes donc ainsi Pourquoi ne suis second dieu d'amitié?

Las ! je n'ay pas l'arc et les traits aussi Pour esmouvoir ma maîtresse à pitié.

Amour perdit les traictz, qu'il me tira, Et de douleur se print fort à complaindre : Vénus en eut pitié, et soupira.

Tant que par pleurs son brandon feit esteindre, Dont aigrement furent contrainctz de plaindre : Car l'archier fut sans traict, Cypris sans flamme. Ne pleure plus, Venus; mais bien enflamme Ta torche en moy : mon cœur l'allumera. Et toy, enfant, cesse : va vers ma dame, Qui de ses yeux tes flèches refera.

Voy que l'hyver tremblant en son séjour, Aux champs tous nuds sont leurs arbres failliz. Puis le printemps ramenant le beau jour, Leur sont bourgeons, feuilles, fleurs, fruictz sailliz. Arbres, buissons, et hayes, et tailliz Se crespent lors en leur gaye verdure.

Tant que sur moy le tien ingrat froit dure. Mon espoir est dénué de son herbe :