DIZAIN

Je te promis au soir que pour ce jour Je m'en irois, à ton instance grande, Faire chés toy quelque peu de séjour : Mais je ne puis : parquoy me recommande, Te promectant m'acquicter pour l'amande, Non d'un seul jour, mais de toute ma vie, Ayant tousjours de te complaire envie.

Donc te supply accepter le vouloir, De qui tu as la pensée ravie ' Par tes vertus, ta grâce et ton sçavoir.

Quand vous voyez que l'estincelle Du chaste amour soubs mon esselle Vient tous les jours à s'allumer, Ne me debvez-vous bien aymer?

Quand vous me voyez tousjours celle, Qui pour vous souffre, et son mal cèle. Me laissant par luy consumer, Ne me debvez-vous bien aymer?

Quand vous voyez que pour moins belle Je ne prens contre vous querelle, Mais pour mien vous veulx reclamer, Ne me debvez-vous bien aymer?

Quand pour quelque autre amour nouvelle Jamais ne vous seray cruelle, Sans aucune plaincte former.

Ne me debvez-vous bien aymer?

Quand vous verrez que sans cautelle * Tousjours vous seray esté telle, Que le temps pourra affermer.

Ne me devrez-vous bien aymer?