LIVRE V, CHAPITRE II

en Cignes, et des hommes de Pallene en Thrace, lesquels soubdain que par neuf fois se baignent au palude Tritonique, sont en oiseaux transformez. Depuis, autre propos ne nous tint que de cages et d'oiseaux. Les cages estoient grandes, riches, somptueuses, et faictes par merveilleuse architecture.

Les oiseaux estoient grands, beaux et polis à l'advenant, bien ressemblans les hommes de ma patrie : beuvoient et mangeoient comme hommes, esmoutissoient comme hommes, enduisoient comme hommes, petoient, dormoient et roussinoient comme hommes : brief, à les veoir de prime face, eussiez dit que fussent hommes; toutesfois ne l' estoient mie, selon l'instruction de maistre Aeditue, nous protestant qu'ils n' estoient ny séculiers, ny mondains. Aussi leur pennage nous mettoit en resverie, lequel aucuns avoient tout blanc, autres tout noir, autres tout gris, autres miparti de blanc et noir, autres tout rouge, autres parti de blanc et bleu : c'estoit belles choses de les veoir. Les masles il nommoit Clergaux, Monagaux, Prestregaux, Abbegaux, Evesgaux, Cardingaux et Papegaut, qui est unique en son espèce. Les femelles il nommoit Clergesses, Monagesses, Prestregesses, Abbegesses, Evesgesses, Cardingesses, Papegesse. Tout ainsi toutefois, nous dist il, comme entre les abeilles hantent les freslons, qui rien ne font fors tout manger et tout gaster, aussi depuis trois cens ans ne sçay comment, entre ces joyeux oiseaux, estoit par chascune quinte lune avolé grand nombre de cagots, lesquels avoient honny et conchié toute l'Isle, tant hideux et monstrueux, que de tous estoient reffuis. Car tous avoient le col tors, les pattes pelues, les griphes et ventre de Harpies, et les culs de Stimphalides, et n'estoit possible les exterminer : pour un mort en avoloit vingt quatre. Je y souhaitoye quelque second Hercules, pour ce que frère Jehan y perdit le sens par véhémente contemplation, et à Pantagruel ad\'int ce qu'estoit advenu à messire Priapus contemplant les sacrifices de Ceres, par faute de peau.