CHAPITRE XI

COMMENT NOUS PASSAMES LE GUICHET HABITÉ PAR GRIPPEMINAUD, ARCHIDUC DES CHATS FOURREZ

Quelques jours après, ayans failly plusieurs foys à faire naufrage, passasmes Condemnation, qui est une aultre Isle toute déserte ; passasmes aussi le Guichet, auquel lieu Pantagruel ne voulut descendre, et fit tresbien, car nous y fusmes faits prisonniers, et arrestez de faict par le commandement de Grippeminaud, archiduc des Chats fourrez, parce que quelqu'un de nostre bande voulut vendre à un serrargent des chapeaux de Cassade. Les Chats fourrés sont bestes moult horribles et espouvantables : ils mangent les petits enfans et paissent sus des pierres de marbre. Advisez, beuveurs, s'ils ne devroient bien estre camus. Ils ont le poil de la peau non hors sortant, mais au dedans caché, et portent pour leur symbole et devise tous et chascun d'eux une gibbeciere ouverte, mais non tous en une manière : car aucuns la portent attachée au col en escharpe, aultres sus le cul, aultres sus la bedaine, aultres sus le costé, et le tout par raison et mistere. Ont aussi les griphes tant fortes, longues et asserées, que rien ne leur eschappe, depuis qu'une fois l'ont mis entre leurs serres. Et se couvrent les testes, aucuns de bonnets à quatre gouttières ou braguettes; aultres, de bonnets à revers; aultres, de mortiers; aultres, de caparassons mortifiez. Entrans en leur Tapinaudiere, nous dist un gueux de l'hostiere, auquel avions donné demy teston : « Gens de bien. Dieu vous doint de leans bien tost en saulveté sortir : considérez bien le minois de ces vaillans piUers, arboutans de justice Grippeminaudiere. Et notez que si vivez encore six Olympiades et l'aage de deux