LIVRE V, CHAPITRE XXII

demandant dont sourdoit leur différent, entendy que jà quatre jours estoient passez depuis qu'ils avoient commencé disputer de trois hautes et plus que phisicales propositions, à la resolution desquelles ils se promettoient montaignes d'or. La première estoit de l'ombre d'un Asne couillard; l'autre, de la fumée d'une Lanterne; la tierce, de poil de Chèvre, sçavoir si c'estoit laine. Puis nous fut dit que chose estrange ne leur sembloit estre deux contradictoires vrayes en mode, en forme, en figure, et en temps. Chose pour laquelle les Sophistes de Paris plus tost se feroient desbaptiser que la confesser.

Nous curieusement considerans les admirables opérations de ces gens, survint la Dame avec sa noble compagnie, jà reluisant le clair Hesperus. A sa venue fusmes de rechef en nos sens espouvantez et esblouys en nostre veuë. Incontinent nostre effray apperceut, et nous dist : « Ce que fait les humains pensemens esgarer par les abysmes d'admiration n'est la souveraineté des effects, lesquels apertement ils esprouvent naistre des causes naturelles, moyennant l'industrie des sages artisans : c'est la nouveauté de l'expérience entrant en leurs sens, non prevoyans la facilité de l'œuvre, avec jugement serain s'y associe d'estude diligent. Pourtant soyez en cerveau, et de toute frayeur vous despouillez, si d'aucune estes saisis à la considération de ce que voyez par mes officiers, estre faict. Voyez, entendez, contemplez à vostre hbre arbitre, tout ce que ma maison contient ; vous peu à peu emancipans du servage d'ignorance. Le cas bien me siet en volonté. Pour de laquelle vous donner enseignement non feint, en contemplation des studieux désirs desquels me semblez avoir en vos cœurs fait insigne mont-joye et suffisante preuve, je vous retiens présentement en estât et office de mes abstracteurs. Par Geber, mon premier Tabachin, y serez descrits au partement de ce heu. » Nous la remerciasmes humblement, sans mot dire : acceptasmes l'offre du bel estât qu'elle nous donnoit.